Reportajen Umbelina dos Reis
Reprezentante Prezidente Institutu para defeza das crianças (INDICA), Laura Afonso de Almeida hateten, INDICA nia papél mak oinsa atu halo salva guarda no asegura inan-aman, labarik inklui autoridade lokál sira oinsá sira bele hatene konaba direitu labarik nian. Nune’e informasaun ne’ebe durante INDICA partilla mak hanesan direitu labarik nia hosi prespektiva legal no mos direitu labarik nian ne’ebe inan-aman tenki asegura.
” Dezafius ne’ebe ita hasoru Iha Timor mak ita labele nega, tanba ita iha sosiedade ida ne’ebe mak konstrui mentalidade katak moris ne’e tenki iha oan, maibe oan nia investimentu ba futuru ne’e sai oinsa inan-aman la interese.” Dehan reprezentante Prezidente INDICA, Laura Afonso de Jesus, liuhosi nia Semináriu Nasionál iha salaun João Paulo II Comoro, sexta-feira, 05/12.
Nune’e oinsa ita bele tau importansia ba labarik sira nia futuru, depois korajen tan konaba biblia katak kria ema barak hanesan fitun no rai henek ne’ebe barak iha tasi maibe, oinsá labarik sira nia investimentu ba futuru.
Governu nia prezensa atu kria politika ne’ebe kualidade maibe fila-fali ba ema pesoal nia an katak saida mak ema planeia bainhira iha oan, se ita iha polítika oin-oin maibe ita-nia sosiedade rasik laiha planu, oinsá investe ba labarik nia futuru entaun politika ne’e la vale ba buat ida.
” Tanba liuhosi monitorizasaun ne’ebe INDICA halo liuhosi uma mahon no orfonatu ne’e tuir lo-loos uma mahon ne’e hari’i ba labarik sira ne’ebe presiza duni maibé infelizmente uma mahon balun labarik sira ne’ebe hela ne’eba inan-aman kompletu no inan-aman mai ho razaun dehan laiha kapasidade, tanba vulnerabilidade ba ekonomia estruturadu entaun maromak kria ita liuhosi sabedoria ne’e oinsá.” Nia dehan.
Nune’e orfonatu ne’e ba labarik sira ne’ebe inan-aman mate no familia laiha mak bele hela, tanba orfonatu ne’e alternativu ikus ba labarik sira ne’ebe familia laiha, maibe realidade labarik balun ne’ebe hela iha orfonatu ne’e inan-aman kompletu entaun oinsá ho inan-aman nia responsabilidade.
” Lisan Timor nia bain-bain dehan oan barak aban bainrua riku barak, maibe ita lahatene riku ne’e mai hosi ne’ebe, inan-aman la hanoin oinsa oan barak ne’e nia futuru.” Nia subliña.
Nia konklui, Labarik balun INDICA konsege entrega fila-fali ba nia familia ligada ho traballu infantil tanba labarik balun ba hela ho familia ka ema ne’ebe bolu sira hodi ba hela, laos ba hela de’it maibe haruka sira servisu hetan rendimentu ba sira entaun labarik sira ba hela ne’e hodi ba han no hemu deit maibe servisu ne’ebe lor-loron sira halo ne’e rezultadu ba ema seluk. Labarik balun inan-aman la autoriza eskola too finalidade tanba dehan situasaun ekonomia, maibe inan-aman tau prioridade ba halo lia-mate lia-moris.
“INDICA servisu hamutuk ho parseiru sira tau matan ba labarik sira ne’ebe vitima ba violénsia doméstika, abuzu sexual oinsa sira bele asesu fila-fali ba edukasaun ne’ebe dau-daun ne’e sira aprende ba hodi nune’e asegura sira nia identidade pesoal.” Nia dehan.
