Tribunál Judisial Primeira Instansia Dili (TJPID), iha segunda (13/07), liu hosi prosesu Primeiru Interogatoriu deside hodi hatun despaxu ba sidadaun estranjeiru Chinese hamutuk nain-96, hamutuk medida rua mak hanesan medida Proibisaun Auzensia no medida Kausaun $3000 ba kada ema arguido.
Liuhusi prosesu Primeiru Interogatoriu ne’e, Tribunál deklara katak, durante loron tolu nia laran Tribunal halo prosesu Primeiru Interogatoriu ba arguidu nain 96 ne’e, ikus mai Tribunál deside hodi hatun despaxu ba arguidu nain-96, ne’ebé mak komete kazu online Scam Call Center iha área Bebonuk.
Tribunál deklara, medida ne’ebé mak Tribunál aplika ba arguidu sira hamutuk nain 96 ne’e mak Medida Proibisaun Auzensia, medida Kausaun ba kada arguidu ida $3.000, ho prazu loron 10 nia laran hodi bele garante prosesu investigasaun no Tribunál mós mantein aplika medida koasaun Termu Identidade Rezidensia (TIR) no bainhira arguidu sira la kumpri medida sira ne’ebé mak Tribunál aplika mak Tribunál sei halo alterasaun ba medida refere, no osan sira ne’e sei afavor ba kofre ba estadu.
Antes ne’e iha alegasaun Ministériu Públiku nia husu Tribunál atu aplika medida Proibisaun Auzensia no medida Kausaun kada arguidu ida $3.000 no arguidu ida mak medida Kausaun $5.000.
Nune’e parte Defeza ba arguidu nain-neen (6), Advogadu Privadu, Pedro Camões, aseita alegasaun Ministériu Públiku nia, tanba ne’e husu Tribunál atu aplika medida Proibisaun Auzensia no medida Kausaun $3.000 ba kada arguidu no iha arguidu nain-ida mak medida kauasaun $5.000. Maibé Defeza ba arguidu nain-90, Advogadu privadu, Octavio Cardozo no Januario Martins husu Tribunál atu aplika medida Proibisaun Auzensia no medida Kausaun no medida Kausaun $2.000 ba nia kliente nain-90.
“Iha alegasaun Ministériu Públiku nia husu Tribunal atu aplika medida Proibisaun Auzensia no medida Kausaun $3.000 ba arguidu sira no arguidu nain-ida mak husu Tribunal atu aplika medida Kausaun $5.000, tanba Prokurador intende katak nia mak hola Billete hosi Xina mai Timor no aban ba fali ne’e mak dehan nia mak patraun entaun nia mak selu $.5000. No Defeza nia husu Tribunal aplika medida Proibisaun Auzensia no medida Kausaun$3.000 ba nain-95 no iha arguidu nain-ida mak $5.000 no Defeza nain-rua aseita ba $2.0000 ba kada arguidu”, informa, nia ba Jornalista sira, iha TJPID Kaikoli,(12/07).
Nia dehan, tuir Defeza nia intende katak fo tempu ba autoridade sira hodi halo servisu didi’ak, nune’e to’o tempu ita bele iha provas konkreta, tanba ne’e bainhira iha seidauk iha vitima labele kondena sira.
“Ba Burla informatika ne’e tenke ser iha vitima, tenke ser iha transaksi osan ne’e tenke manda hosi ne’ebá mai no hosi ne’e ba. Tanba ne’e fo tempu ba autoridade kompotente atu investiga klean kona-ba multa sira husu $3.000 no ha’u nia kolega nain-rua aseita ba $2.000 kada ema, maibé ba ha’u ema ne’ebé mak hola de’it Billete ne’e normal”, nia informa.
Nune’e Ministériu Públiku promove krime ba arguidu sira ba iha Tribunal, hamutuk krime haat mak hanesan Krime Jogu ilisitu, Asosiasaun Kriminoza, Burla informatika, Brankeamentu kapitais.
Iha Prosesu primeiru interogatoriu ne’e, prezide hosi Juiz kolektiva turnu, Ivan Patrecenio no estajiariu nain-rua, Ministériu Públiku reprezenta Prokurador nain-rua, arguidu nain-96 ne’e, hetan asistensia legal hosi advogadu privadu nain-tolu, Pedro Camões, Octavio Cardozo no Januario Martins.
