Reportajen Santina Lucia da Costa, Zevonia Vieira
Estudante iha Universidade Nasionál Timor Lorosa’e (UNTL), sira hahú halo re-inskrisaun ba semester impar, maibe estudante sira duvida ba kritériu hirak ne’ebé mak fó sai katak, estudante sira rejistu ba semester impar tenki uza kartaun eleitorál, ho razaun estudante sira ne’ebé hetan subsídiu husi governu, tenke kumpre rekizitu ne’ebé universidade iha.
Jornalista Neon Metin halo entrevista ho Estudante UNTL, ho naran inisiál GS, ne’ebe hato’o nia preokupasaun katak, kritériu ne’ebé mak fó sai husi Universidade halo sira duvida, tanba subsídiu primeiru la uza kartaun eleitorál, maibé mai fali subsídiu segundu uza fali kartaun eleitorál.
“Kona-ba kriteria ida agora, karik iha intensaun ruma ne’e hau la dun hatene, tanba nu’udar estudante kriteria ne’ebé mak iha tuir de’it, subsidiu ida ne’e apoiu husi governu, formuláriu ne’ebé mak ami prienxe husu mós kartaun eleitorál, se kartaun eleitorál laiha, bele uza Billete Identidade (BI), hau rasik laiha kartaun eleitorál, entaun uza de’it BI.” Hateten, Estudante UNTL GS ba Neon Metin iha Kampus Central, UNTL, Kuarta 26/01.
GS haktuir maske duvida ba rekizitu refere, maibé nu’udar estudante tuir de’it regulamentu ne’ebé mak Universidade nian iha. “Posivelmente duvida tanba situasaun ida agora hanesan ne’e mak derrepente mai ho regulamentu ida hanesan ne’e, maibé nu’udar estudante tuir de’it regulamentu ne’ebé mak iha.”
Hanoin hanesan mos mai husi estudante UNTL, ne’ebe sedauk livre teoria IL via telefone ba Neon Metin hateten, premeira vez kampus husu ba rejistu ka halo re-inskrisaun ba semester impar presiza lori kartaun eleitora.
“Hau mos konfuzaun hela tanba sa mak universidade husu ami lori kartaun eleitora, tanba iha semester kotuk nian, sira la husu kartaun eleitorál. Sira husu ami lori foti copy kartaun eleitoral no resibu. Uluk ne’e sira haruka foto copy ami nia resibu deit, agora sira haruka foto copy resibu no kartaun eleitoral”, dehan IL ba Neon Metin via telefone, 26/01.
Husi Preokupasaun hirak ne’e, Neon Metin tenta halo konfirmasaun ho Reitór UNTL, maibé nia labele fó informasaun tanba ida ne’e parte administrasaun UNTL nian mak hatene.
Nune’e Neon Metin halo konfirmasaun ho parte Diretór Diresaun Nasionál Atendimentu Estudante (DNAE) UNTL, Rui Loco Pires esplika katak bazeia ba orientasaun ne’ebé maka parte Administrasaun Jeral Serbisu Akademika orienta ona, mai Diresaun Nasionál Administrasaun, estudante tuir oráriu ne’ebé mak iha, tanba Estudante UNTL semester impar agora daudaun sei hetan subsídiu husi Ministériu Ensinu Superior, tanba ne’e parte finansas iha nia kritériu.
Diretór DNAE hatutan estudante ne’ebé mak hetan subsídiu, nia tenki tuir rekezitu ne’ebé mak iha. Tanba finansa atu entrega estadu nia osan ba estudante ho montante propinas $30.00, entrega resibu ne’e ba estudante, maske la ho osan, maibé ho resibu entaun parte finansas tenki-ser rai hela husu kartaun eleitorál, no formuláriu ne’ebé mak resibu atu rai hela, nune’e hato’o relatóriu ba finansas Ensinu Superior ninian.
“Antes ne’e ho situasaun Covid-19, kartaun eleitoral balun husu, balun la konsege, tanba ne’e relatóriu ami nian semester impar ba parte finansas nian iha Ensinu Superior, la dun simu tanba la kompletu, ho nune’e semester impar agora daudaun ami prepara, liuliu parte finansas nian prepara atu atende fali ita nia estudante ne’e ho kartaun eleitorál, atu nune’e bele hato’o relatoriu finansas ne’bé mak Ensinu Superior mai entrega ba UNTL”, dehan Diretor DNAE ba Neon Metin
Iha situasaun besik eleisaun prezidensiál, publiku deskonfia karik iha indikasaun atu akumula kartaun eleitorál, ba kandidatu prezidente balun? Ba Neon Metin Diretor DNAE esplika katak la hanoin to’o iha ne’eba, tanba ida ne’e parte administrasaun atu atende estudante, servi estudante sira, kona-ba kandidatu ne’e politika nian, parte administrasaun sei la hatene to’o iha ne’eba.
Nia Salienta, estudante ne’ebé mak hetan subsídiu husi Governu, tenki tuir kriteria ne’ebé mak finansas fó mai, se enkuantu dokumentu la kompletu, entaun relatóriu ba iha finansas Ensinu Superior la simu.
“Antes ne’e informasaun ladun hato’o ba estudante sira, maibé parte finansas husi Ensinu Superior hato’o mai tarde, entaun parte akadémika, parte administrasaun mós la hato’o iha ne’eba, tanba relatoriu ne’e baibain iha UNTL, maibé ho osan ne’ebé mak governu hato’o mai, governu nia kriteria mós iha, entaun ami parte atendimentu estudante ne’e, ami foin husu ho kartaun eleitorál para relatóriu ne’e hato’o ba Ensinu Superior.” tenik Rui.
Rui Loco haforsa tan, kritériu ne’e husi Finansas Ensinu Superior nian, ninia kriteriu ne’e osan hira tenki ho kartaun eleitorál, tanba ema ida simu osan $30 dollar, ne’e la’os simu de’it resibu, tenki ho kartaun eleitoral, atu nune’e bele agrapa hamutuk ho formulariu ne’ebé mak iha.
Ho ida ne’e, parte akademika, fó hanoin ba estudante sira, lalika duvida tanba relatoriu ne’ebé mak parte finansas atu hato’o la’os atu hanoin ba buat seluk.
Iha fatin hanesan, Vise-Reitór Asuntu Akademiku, Samuel Venancio da Silva Freita afirma agoraprosedimentu rejistu hahú ezije kartaun eleitorál labele hanoin liu ba politiku, labele hanoin lori kartaun eleitoral ba fali partidu, se mak lori dokumentu ida ne’e ba fali partidu seluk ne’e krime.
Nia afirma subsidiu primeiru estudante hamutuk 23 mil resin balun la hetan, depois fó tan lista adisional ba soma hamutuk fali estudante total 27 mil resin, tuir livru ne’ebé UNTL iha, para atu hetan subsídiu.
Nia dehan depois segundu faze, bazeia nafatin númeru ne’ebé hanesan estudante total 27 mil resin, depois halo pagamentu, depois verifika sé la ativu ona, hasai naran, osan fila-fali ba estadu.
Loron 19 Marsu povu Timor sei partisipa iha eleisaun prezidensial, iha tempu agora kandidatu sira ne’ebe sei kompete rekolla hela kartaun eleitoral minimu 5000, no kada munisipiu minimu 100 hodi kompleta rekezitu ne’ebe Lei haruka. Kartaun eleitoral sai diskusaun publiku iha situasaun agora, iha tempu hanesan estudante UNTL mos halo re-inskrisaun ba semester impar ho uza kartaun eleitoral. Duvida mosu tanba sa iha tempu ne’ebe hanesan, ho ema rekolla kartaun eleitoral ba kandidatu prezidente sira??
