Reportajen Adroaldo ‘Saretukau’
Grupu Timorese English Club (TIEN CLUB), organiza formasaun ba juventude sira iha Sentru Treinamentu Vokasional Juventude (STVJ), Manleuana konabá ‘implementasaun husi siklu moris liga ba estilu moris joven nian’ oinsá joven sira la’os kuda de’it hahalok simpatia, maibé tenke iha mos empatia atu tama no sente ema nia moris liu hosi foti asaun hodi tulun sofrimentu balu mak ema hasoru liu hosi asaun solidariedade, liu-liu iha moris komunidade lor-loron nian.
Formasaun loron sorin ne’e fasilita hosi Alumni Parlamentu Foinsa’e Timor-Leste (APFTL), Joni Alves, hodi ko’alia konabá siklu moris ema nian liu-liu oinsá atu ema iha empatia hodi sente ema seluk nia sofrimentu hodi sente mos saída mak ema sente no tau iha asaun hodi tulun ema sai hosi problema ne’ebé nia hasoru.
“Buat ida mak ita tenki haree iha ita nia situasaun ohin loron, iha 4 Abril liu ba, iha komunidade, família lubuk ida mak enfrenta situasaun difisil iha akontesimentu ne’e, saída mak ita halo, ema ba lori nia aan tama ba ema seluk nia mundu ne’e, sira hatudu asaun, la’os sira sente de’it, aih kuitadu! Ema ne’e hetan susar hanesan ne’e mais, ema ba lori fos lata ida, supermie falun ida, sira halo sira nia asaun solidariedade ho ki’ik, maibé ema ne’e sente, halo ema ne’e hamnasa, ida ne’e mak rezultadu hosi empatia,” hatete Alumni APFTL ne’e iha formasaun konabá siklu moris ne’ebé organiza hosi TIEN CLUB iha iha sentru STVJ Manleuana, 29/01.
Nia hatutan empatia la’os lori ita tama de’it ba ema nia mundu maibé halo asaun atu ema ne’e bele sente kmaan ou bele iha ksolok hosi ita nia prezensa. Nia hatete ema nia moris ne’e la hanesan ida ho seluk, tanba ne’e iha ema ruma mak hasoru difikuldade ka problema ruma, labele fasil atu foti desizaun hodi julga maibé koko atu tama ema nia mundu hodi buka hatene tanba sá mak situasaun ne’e akontese. Nia mensiona mos akontesimentu sira mak ita sempre akompaña iha ita nia sosiedade hanesan ema soe bebe, tara aan no akontesimentu seluk mak ita la espera katak, ita presiza buka hatene uluk antes julga ema ne’e nia asaun liu hosi ita nia empatia.
Iha fatin hanesan Prezidente TIEN CLUB, Marzeni Lopes, agradese ba fasilitador bele fasilita formasaun siklu moris ne’e ba juventude sira, nia espera katak liu hosi matéria ida ne’e, bele lori joven sira iha liu tan empatia ho sira nia família, belun ka ema sira mak sira besik.
“Bainhira ita boot sira transmite informasaun ne’e, ne’e signifika katak o bele tulun mos ema seluk, só labele rai de’it matéria ida ne’e ba imi nia aan, maibé ida ne’e tenki fahe no transforma ba ita boot nia kolega sira, ida ne’e sei afeita, sira sei hetan informasaun hosi saída mak ita boot sira aprende iha ne’e, sira sei kontente ba ida ne’e,” hatete Marzenio.
Iha formasaun ne’e partipante sira kontete tebes tanba sira bele aprende oinsá atu sente mos ema seluk nia difikuldade no problema atu hamenus sira nia sofrimentu liu hosi hakbesik no fo ksolok ba sira.
