Reportajen Umbelina dos Reis
Asosiasaun Halibur Defisiente Matan Timor-Leste (AHDMTL) konvida Eis Prezidente Repúblika, José Ramos Horta hodi haree besik kondisaun asosiasaun nian, ne’ebé oras ne’e da-dauk sira enfrenta no husu atu mellora liu tan atendimentu ba ema ho defisiénsia, inklui apoiu sira ba defisiénsia sira iha Timor-Leste.
Diretór Ezekutivu AHDMTL, Gaspar Afonso hatete katak vizaun hosi premiadu Nobel da Paz, José Ramos Horta, ema ida mak fuan boot, laran luak apoiu organizasaun ida ne’e, atu fo atendimentu adekuadu di’ak ba ema defisiénsia matan sira iha Timor-Leste. Nia hatete ho kondisaun toba fatin no fatin aprendizajen la dignu ba defisiente sira, mak sira konvida Dr. José Ramos Horta ba vizita sira nia fatin.
“Akumulasaun iha fatin ida ne’e ema na’in 90, mane 45, feto 45, sira ne’ebé atu mai ne’e lubuk ida, maibé fatin limitadu, entaun ami trava lai balun, i ha’u espera katak tinan ida ne’e ami hetan fatin di’ak, favoravel no konfortavel ho kondisaun dignu, ami sei lori sira barak liu tan atu mai aprende liu hodi formasaun ba letra Braille no treinamentu AHDMTL nian,” Diretór Gaspar hato’o iha vizita Dr. Ramos Horta nian, iha Edifísiu AHDMTL, Manleuana, 22/02.
Gaspar Afonso hatete, AHDMTL harii iha loron 1 Fulan Jullu tinan 2011, fundador mak nia rasik ho nia ekipa. Nia hatete, “ami harii organizasaun ida ne’e laos ha’u nian mesak, maibé ba ema defisiénsia Timor laran tomak, ami hanesan fontes de’it atu kore sira husi pobreza intermus de edukasaun no husi diskriminasaun sira.”
Nia hato’o karik eis Prezidente Repúblika, Dr. Ramos Horta nia vizita espesial ne’e karik eleitu tana dala ida ba prezidente repúblika tinan 2022-2027, husu mellora liu tan atendimentu ba ema ho difisiénsia, rekomenda mos ba governu nia seriedade fo apoiu no atendimentu ba difisiénsia sira iha rai doben Timor-Leste.
Durante ne’e doadór ba AHDMTL mak UNICEF, Plan International, UNDP, MSSI, Gabinete Apoiu Fundu Sosiedade Sivil mak durante ne’e apoiu asosiasaun refere.
Bazeia ba sensus tinan 2015 ema difisiésia iha Timor-Leste total 38.118 kompostu husi defisiénsia matan 14.828, defisiensia tilun ka la bele rona no labele koalia 12.511, difisiénsia motora 7.466, defisiésia fíziku sosial ka moras mental 3.313.
