Reportajen David da Costa Gusmao
Konsellu Imprensa Timor-Leste halo monitorizasaun ba kampaña polítika kandidatu Prezidente Republika (PR) periodu 2022-2027, identifika jornalista balun halo promosaun ba kandidatu sira liuhusi fahe-tutan informasaun no matéria sira kampaña polítika nian, iha sira ninia konta midia sosiál (facebook).
Prezidente Interinu Konsellu Imprensa (KI) Timor-Leste, Espedito Dias Ximenes informa, durante monitorizasaun, CI mós indentifika jornalista balu halo promosaun ba kandidatu sira liuhusi fahe-tutan informasaun no matéria sira kampaña polítika nian no halo komentáriu ne’ebé ho tendensia fó apoiu ba kandidatu sira, iha sira ninia konta midia sosiál (facebook).
“Iha ne’e ami sei la hatudu ba A ka B, mas iha ne’e ami Konsellu Imprensa halo avalisaun ho monitorizasaun jerál, Agora ami labele dehan tanba sei iha hela prosesu verfikasaun, depois de verfikasaun hotu maka foin hato’o fali jornalista sira ne’ebe maka komite iha infrasaun,”Dehan Prezidente Interinu Konsellu Imprensa (KI) Timor-Leste, Espedito Dias Ximenes, liuhosi konferensia Imprensa iha edifisiu KI Kintal Boot, Sesta 25/03.
Husi rezultadu monitorizasaun no análize ne’e, Kl hola pozisaun no foti asaun sira katak, sei notifika ka fó samada ba jornalista sira ne’ebé komete infrasaun hasoru Kódigu Étika Jornalístika, Lei Komsos, Matadalan Reportajen Eleitoral no Matadalan Midia Sosiál ba Jornalizmu.
“KI Sei fó sansaun forte ba jornalista sira ne’ebé komete infrasaun “grave” hasoru Kódigu Étika Jornalístika, Lei Komsos, Matadalan Reportajen Eleitorál no Matadalan Midia Sosiál ba Jornalizmu,” tenik nia.
Iha fatin hanesan Diretór ezekutivu Konsellu Imprensa (KI) Timor-Leste, Rigoberto Monteiro dehan se jornalista sira ka meiu komunikasaun sosial sira maka halo infrasaun grave iha kode etika jornalizmu nian no lei komunisaun sosial maka KI sei fó sansaun administrativa no selu koima.
“Mais importante liu, ita iha sansaun rua tuir loloos lei, primeru sansaun administrativa, KI ita iha prosesu prosedimentu iha para atu uza, segundu maka uza sansaun koima maibe to’o agora ita seidauk aplika koima tanba nia prinsipiu dekreitu lei konaba koima seidauk kalaru, entaun saida maka KI iha kompetensia atu foti maka fo sansaun administrativa kuandu nia halo infrasaun grave ba kode etika, lei komunikasaun sosial, ne’e ita nia kompetensia ne’e, sei to’o iha sansaun administrativa, ida ne’e maka ita bele foti,” Rigoberto esplika.
Nuen’e KI sei mantein komunikasaun ho redasaun meiu komunikasaun sosiál sira atu asegura ninia jornalista hodi nafatin kumpri auto-regulasaun sira hanesan, Kódigu Étika Jornalítika, Matadalan Reportajen Eleitorál no Matadalan Mídia Sosiál ba Jornalizmu iha periódu segunda ronde eleisaun prezidensál
