Reportajen Santina Lucia da Costa
Kandidatu Prezidente Republika ho Númeru sorteiu 2, Dr. Francisco Guterres Lú Olo, iha nia komprimisiu politika iha Suai katak, eleitu tan ba Prezidente Repúblika familia ida sei simu osan to’o $ 200 dollar iha tinan ida remata, iha fulan Dezembru nian.
Komprimisu politika ida ne’e hato’o iha ambitu kampaña ba daruak ba povu iha Postu Administrativu Suai, Munisipiu Covalima.
Iha Kampaña Abertura iha Gleno, Lú Olo koalia ho Primeiru Ministru, Taur Matan Ruak katak, funsionariu sira to’o tinan remata fulan Dezembru sira simu sira nia desimu terseiru mês, ne’ebé liuhusi dekretu governu nian haruka ba Prezidente Republika aprova mak foin sira simu.
“Prezidente Partidu Libertasaun Popular, Taur Matan Ruak, hatan kedas aseita ho proposta ida ne’e, katak sé Prezidente Republika liu iha loron 19 Abril agora, iha fulan Dezembru implementa programa ida ne’e, katak familia ida sei bele simu osan to’o $200” hateten Kandidatu PR, Francisco Guterres Lú Olo, Iha Suai, Covalima, 3/4.
Lu Olo realsa tan sei la halo promesa falsu iha sira nia vida no sei kumpre saida mak promete ona.
Prezidente Repúblika bainhira governu atu hala’o ninia programa, nia tenke halo orsamentu define ninia orsamentu, orsamentu ne’e bele tau ho programa ida ne’e, hodi implementa ninia programa para hadia povu ida ne’e nia moris.
Nia hatutan, osan ne’e koloka duni ka tau duni nesesidade povu nian ka lae, osan tau iha ne’eba para hadia estrada, hadia ekonomia povu ninian atu halo produsaun ka lae, hadia ita nia-oan sira nia eskola ka lae, osan tau iha programa saude povu ninia ka lae, Prezidente Republika sukat tetu buat sira ne’e hotu, hafoin osan ne’e iha tau hotu nia fatin, Prezidente Republika bele asina dokumentu ida ne’e ka lei ida ne’e, mak foin promulga.
Nia dehan bainhira Prezidente Republika promulga ona, governu implementa para hodi hala’o nia knár hala’o programa para hadia povu nia moris.
“Hau hatene kumpre hau nia papel ida ne’e importante tebes, se bainhira karik osan ne’e ladun tau didi’ak tuir programa ne’ebé aprova iha Parlamentu nasional, klaru Prezidente Republika iha hanoin oin seluk, nia bele haruka fila-fali ba Parlamentu Nasional, para hadia orsamentu ida ne’e tau halo loloos ba povu ida ne’e nia nesesidade, Parlamentu hadia haruka fila ba Prezidente Republika para promulga.” hateten, Lú Olo.
