Reportajen Joselina Dos Santos
Dulce de. F. Ximenes, nu’udar mós sobrevivente husi Masakre Santa Crus husu ba Governu hodi hasae feto nia papél hanesan ho mane sira. Feto nia luta ba ukun-an ne’e boot tebes, nune’e ohin loron ema hotu goza, maibe governu la dun tau importansia ba feto nia partisipasaun iha deznvolvimentu nasional no la dun tau importansia ba familia sobrevivente sira.
“Oihn loron ne’ebe espesial tebes ba sobrevivente 12 Novenvru ne’ebé sei moris no ba sira nebe mate, maske triste maibe ho fuan boot. Liu husi loron ohin mak bele lori no hatudu ba mundu internasional katak Timor ukun-an no hetan demokrasia”, dehan Sobrevivente Dulce ba Neon Metin bainhira partisipa iha Komemorasaun Masakre Santa Cruz 12 Novembru 1991 ba 3I, iha Santa Crus, Sabadu 12/11.
Iha komemorasaun ne’e Dulce de. F. Ximenes haktuir, feto nia papél importante tebes tanba brani ho fuan boot hodi foti desizaun iha situasaun difisil atu haforsa juventude loriku Asuwain sira hodi luta ba ukun-an. Ne’e signifika katak feto la tauk mate ba liberdade, maske mai husi eskola nebe diferente maibe hamutuk ho unidade.
Bainhira husu atu kompara joven uluk ho agora Dulce hatete katak nia triste tebes tanba ita halo kompara joven uluk no agora diferente tebes. Joventude uluk sakrifika aan atu hetan ukun-an, maibe joventude agora kria grupu buka problema no atu oho malu. Entaun sira nia hanoin ba futuru ne’e la iha no sei iha hanoin nebé klo’ot. Sira hanoin katak Organizasaun Artemarsiais mak lori sira ba dalan diak, afinal realidade Artemarsiais ne’e lori sira ba dalan nakukun entaun sira rasik mak hamate sira nia futuru.
Dulce husu ba Governu tenke uza plataforma ida diak hodi problema mak akontese beik-beik atu iha futuru labele akontese tan. Governu tenke hadia sistema ka lei ne’ebe rigorosu, karik la hadia mak nasaun sei la ba oin.
