Reportajen Adroaldo “Saretukau”
Sekretária Estadu Juventude no Desportu (SEJD) ho Governu Korea liu hosi ajénsia KOICA, hala’o Projetu Desportu Dezenvolvimentu ba Labarik iha Timor-Leste durante fulan neen, ho objetivu atu dezenvolve labarik sira talentu iha futebol no mos forma labarik sira nia karakter, nu’udar joven ida di’ak iha futuru mai.
Liu hosi atividade Festival Desportu ne’ebé hala’o Segunda ne’e (21/11) iha Kampo Demokrasia, Díli, futebolista juvenil sira tuir tournament no serimónia graduasaun hodi simu sira sertifikadu ba sira nia atividade durante ne’e.
Sekretária Estadu SEJD, Abrão Saldanha “Nokosiku”, iha nia diskursu, kongratula alin sira ne’ebé partisipa iha tournament ida ne’e, tanba sira hahú susesu ona iha sira nia aktividade treinu durante fulan neen nia laran.
Governante ne’e agradese espesial ba Governu Korea liu hosi projetu ida ne’e, ne’ebé hamutuk ho ajénsia KOICA no patrosinador sira seluk ne’ebé mak apoiu tomak ba eventu ida ne’e, hodi tulun futebolista juvenil sira nia treinu no aprende atu sai futebolista no joven ida ba aban bairua.
“Programa ne’e nia intensaun mak prepara atu sai futebolista ida, maibé liu-liu prepara atu sai ema ida iha futuru. Ne’ebé aban bairua imi la sai selesaun nasional karik ka la sai karik jogador di’ak ruma mos, ita bele sai hanesan ema di’ak ida ba ita nia rain, ba ita nia família, ba ita nia komunidade no ba mundu,” dehan Sekretária Estadu Abrão iha nia diskursu iha Kampo Demokrasia iha atividade festival no serimónia graduasaun ba futebolista juvenil sira, Segunda ne’e.
Nia hatutan, atividade ida ne’e sei kontinua liu hosi kompetisaun no selesaun sira, tanba ne’e mak bainhira kampu futebol iha Becora di’ak, sira ne’ebé selesionadu sei tama iha asrama no treina intensivu di’ak liu atu sai futebolista no ema di’ak ida. Tanba ne’e nia husu alin sira aproveita di-di’ak oportunidade ne’ebé mak sira hetan hodi badinas nafatin tuir atividade ne’e.
“Imi nian mak futebol de’it, halimar jogu futebol, depois mai eskola tan, ida ne’e mak imi grupu ida ne’e ni-nian, ita hakarak aumenta halo barak liu tan. Tanba ema barak mak hakarak partisipa iha foho ne’ebá maibé programa ne’e la to’o, imi sira iha ne’e mak hetan uluk oportunidade ne’ebé aproveita di’ak liu oportunidade ida ne’e ho di-di’ak liu tan, badinas nafatin ba eskola no badinas nafatin ba treinu tuir imi nia coach no imi nia mentor sira nia orientasaun,” Sekretária Estadu Abrão enkoraja alin futebolista juvenil sira.
Iha fatin hanesan, Elmi Leonardo da Costa (12), nu’udar futebolista juvenil iha atividade ne’e, espresa nia sentimentu kontente wainhira tuir atividade futebol, no nia sente furak tebes tanba futuru nia hakarak sai futebolista di’ak ida. Alein de nia gosta tanba nia bele halibur hamutuk ho nia belun seluk hodi joga, nia mos sente kontente tanba joga ne’e di’ak ba nia saúde.
Iha parte sorin tékniku Federasaun Futebol Timor-Leste (FFTL), Gaspar Quintão hatete, programa ida ne’e di’ak tebes tanba ajuda grassroots no youth development iha área futebol iha Timor-Leste.
“Liu-liu bele akomoda ita nia oan sira, alin jogador ki’ik oan sira, feto, mane, ne’ebé mak durante ne’e namkari hela iha Díli laran ho iha munisípiu sira, durante ne’e sira nia talentu subar hela karik, liu hosi programa ne’e bele akomoda ona imi, iha ona fatin ba imi atu ezerse imi nia talentu, skill ne’ebé mak iha,” dehan Gaspar.
Nia mos enkoraja jogador juvenil sira katak, programa ne’e la’os ba hamosu futebolista di’ak de’it maibé mos atu ajuda tulun sira sai joven di’ak ida iha nasaun hodi kontribui ba iha sira nia komunidade liu hosi saída mak sira aprende ona, karik sira la sai nu’udar jogador ida.
SEJD ho Governu Korea liu hosi KOICA, ita dezenvolve labarik sira liu hosi futebol juvenil, durante fulan neen nia laran. Ohin sira halo sira nia primeira tournament, ho jogador juvenil idade 8-11 no 12-16 iha sesaun dader ho loraik. Atividade ne’e atu fo rekoñesimentu ba sira nia kompeténsia ne’ebé sira iha. Durante ne’e sira nia treinu hala’o iha Kampo Alor ho Komoro.
Patrosinador sira ba aktividade ne’e mak inklui Ministériu Edukasaun Juventude no Desportu (MEJD), FFTL, Kyung Hee University, KODAC, YMCA, World Vision Timor-Leste no Carol Tech Solution.
