Reportajen Joanina Casamiro
Komunidade iha suku Leorema, postu Administrativu Bazartete Munisipiu Liquiça menus ekipamentu Agrikultura hanesan makina hodi fila rai, tanba ne’e autoridade suku husu governu atu hadia komunidade nian problema sira nebe hasoru.
Xefe Suku Leorema, Sandra de Araujo hateten komunidade sira iha Leorema, iha preokupasaun boot liu ba iha agrikultura, sei menus ekipamentu tratór fila rai nia.
“Ami iha preokupasaun boot ba iha ekipamentus hanesan makina tratór atu fila rai, tinan-tinan sempre iha dezafiu ba ida ne’e, dalaruma ami halo proposta husu makina atu lere toos no fila rai,” dehan Xefe Suku Liquisa ba Jornalista sira iha Salaun Luz Klarita 9/12.
Nia konta tuir katak atu fila rai hodi kuda batar, maibé tratór ne’e la to’o tan hektare 2 ou 3, tratór ne’e aat tiha.
“Ami haree katak iha relatóriu tinan kotuk ne’e tun ba bei-beik, tanba husi 19 hektares tun ba iha 14 hektares, nune’e mós bele tu’un tan to’o iha 5 ou 6 hektares, tanba ne’e ita haree katak iha dezafiu boot”, nia subliña.
Mákina sira aat hotu, agora ne’e komunidade komesa kuda batar, lere rasik de’it atu kuda batar, mais agora presiza merkadu tan para depois bele fa’an netik.
