Reportajen Estajiada Agustinha Amaral
Tomas Guterres husi Munisípiu Vikeke, ne’ebé remata ona nia estudu iha Universidade Nasionál Timor Lorosa’e (UNTL), uza nia tempu tuir kursu lian Korea, no da-dauk ne’e nia hetan oportunidade hodi ba servisu iha Korea Sul hodi sustenta família.
“Mezmu ha’u remata ona ha’u nia estudu hanesan lisensiatura. Ha’u hili dalan atu ba servisu iha rai li’ur hanesan Korea Sul, tanba ita nia rai laran menus kampu traballu, tanba ami hanesan sorte ida, hetan oportunidade, husi kursu tinan rua iha SEFOPE, ami tes liu tiha ona, no ohin ami nia kontratu tama, ami mai tuir serimónia despedida atu ba servisu iha Korea Sul,” nia hatete.
Nia orgulllu tanba hetan oportunidade ba servisu iha Korea, no iha futuru sei halo negósiu iha rai laran.
“Ha’u nia mehi karik aban bainrua servisu hetan modal oi-toan, fila mai utiliza modal atu loke business ka loja balun, atu nune’e ha’u bele sustenta ha’u nia família no hakmaan ha’u nia servisu, ha’u bele haree alin sira nia eskola”, tenik nia.
Nia agradese ba Embaixada Korea no SEFOPE, ne’ebé fo ona oportunidade ba sira servisu iha Korea no despede ona sira hodi husik família ba servisu.
“Ha’u hakarak husu agradese ba SEFOPE ho Embaixadór Korea Sul iha Timor-Leste, i en nome ami traballadór hamutuk 50 pesoal, tanba bele hetan oportunidade ida ne’e bele ba servisu iha Korea Sul,” nia hato’o.
Tomas sei ba serbisu iha Korea iha area Peskas no Agrikltura, oinsa hakiak ikan no seluktan, no hanesan bukae ida bele mai aplika fali iha Timor-Leste
