Reportajen Joselina dos Santos
Prezidente eleitu Konsellu Imprensa (KI), Timor-Leste ba periodu 2023-2025, Oteli Ote promete durante mandatu nia sei halo konsolidasaun internál iha KI, no konsolida mós ho instituisaun media sira atu oinsá bele hatene kondisaun media sira nian performa, hodi bele hatene katak media ida ne’ebe iha kapasidade atu bele ezekuta nia servisu loron-loron, no mós serbisu hamutuk atu oinsá bele prevene informasaun falsu iha Timor-Leste.
“Hanesan Prezidente eleitu ha’u iha kompromisu atu kontinua luta ida ne’e, hodi atinje liberdade imprensa no liberdade espresaun iha Timor-Leste, no oinsá atu hametin profisaun iha terenu liuhosi hametin kódigu étika jornalistíka, komparasaun ho média hotu iha rai laran, ha’u espera kontinua hanesan bain-bain”, hatete Prezidente Eleitu Konsellu Imprensa Otelio Ote, liuhosi Konferénsia Imprensa, iha Quintal boot, tersa 07/02.
Prezidente Eleitu Konsellu Imprensa Otelio Ote haktuir, nia sei koko atu tinan rua nia laran defende ba misaun konsellu imprensa nian, nomós halo mudansa ruma ba iha plataforma profisaun jornalista nomós forma kualidade publikasaun media iha rai laran, no buka hatene kona-ba KI ho Diretór Ezekutivu ho nia estrutura, atu konsolida instituisaun media sira oinsá bele hatene kondisaun, atu bele hatene katak media ida ne’ebe iha kapasidade atu bele ezekuta nia servisu loron-loron, atu bele hatudu nia performa iha públiku.
“Kona-ba notísia Hoax ne’e, ita presiza serbisu hamutuk atu oinsá bele prevene hoax, importante mak ita tenke kumpre kódigu étika jornalistíka, tanba Konsellu Imprensa sempre halo monitorizasaun ba publikasaun média hotu, prevensaun ne’ebe di’ak mak media idak-idak ho nia ekipa tomak, tenke integra-aan ba kódigu étika jornalista ne’ebe eziste”, nia hateten.
Nia salienta karik iha media balun defende integridade ema idak-idak nafatin, fila fali ba oinsá media hotu kontrola nia mekanizmu produsaun notísia, liuhosi prosesu redasaun ne’ebé normal ho enkontru redasaun, atu deside konten ida ne’ebe bele publika, no konten ida ne’ebe labele publika atu nune’e bele kontribui situasaun ne’ebe paz no seguru ba públiku.
