Reportajen Joselina dos Santos
Komisaun Reguladora Arte Marsiais (KRAM), sei fasilita kursu ba treinadór sira iha Arte Marsiais, atu aprende oinsá bele hanorin labarik sira ho idade ki’ik, ho objetivu oinsá bele proteje labarik sira. Tanba Organizasaun Arte Marsiais la hanorin jurus tuda malu jurus sunu uma no sunu motór, maibé ida ne’e hanesan atividade desportu ida hodi kontribui ba Dezenvolvimentu Nasionál.
Iha Diálogu Nasionál Labarik ho Lider Nasionál, Paramentu Nasionál, Membru Govenu no parseriu dezenvolvimentu sira, Prezidente Komisaun Reguladora Arte Marsiais (KRAM), Fernando António da Costa (Ato Lekinawa) hatete, KRAM nia servisu atu regula ema sira ne’ebé pratika iha Arte Marsiais, maibé la’os atu regula ema ba sira ne’ebé tuku malu no halo krime iha dalan. Arte Marsiais la hanorin jurus tuda malu jurus sunu uma sunu motór, ida ne’ebé ema haree tuda malu iha dalan ne’e krime entaun sira ne’e polisia mak sei rezolve kuandu se mak halo ida ne’e.
“Oinsa mak proteje sé alin sira ba treinu Arte Marsiais, imi sei hotas kiik kuandu imi ba treina imi nia treinadór sira tenke fó karta ida ba inan aman sira, tenke asina katak inan aman fó lisensa ba oan sira atu treina, kuandu surat ne’e lalori ba treinadór imi labele treina ida ne’e atu proteje alin sira. Bainhira imi treina Arte Marsiais, fatin ne’e labele subar buka iha nakukun no iha Ai-laran maibé fatin ne’e inan aman sira tenke haree no rekoñese”, dehan, Prezidente Komisaun Reguladora Arte Marsiais (KRAM), Fernando António da Costa (Ato Lekinawa” iha CCD merkadu lama, Kinta 16/02.
KRAM sei esforsu hodi fasilita kursu ba Treinadór sira iha Arte Marsiais hanesan ho professor sira, atu sira bele aprende oinsá bele hanorin labarik sira ho objetivu, oinsá bele proteje labarik sira la’os tanba sintu metan ka sintu aas liu, bele hanorin sintu kiik lae, sé hanesan ne’e bele karik, ema sira ne’ebé tuur iha banku sekundaria ne’e bele hanorin Alin sira iha Pré-Primaria maibé labele tanba ne’e treinadór sira tenke hasai kursu kona-ba oinsá atu hanorin labarik sira.
“Ami sei fó ezame ba treinadór sira bainhira sira pasa mak foin bele hanorin, maibé karik la pasa entaun labele hanorin ida ne’e objetivu atu proteje labarik sira. Ami sei esforsu atu Arte Marsiais hotu-hotu tenke iha planu politika atu proteje alin sira, sé sira laiha ami sei bolu sira atu fó atensaun ba sira,” nia esplika.
Alende nia mós ko’alia katak Arte Marsiais sira iha tinan ida ne’e sira sei iha kompetisaun nasionál entre Arte Marsiais 17, ida ne’e mak KRAM sei esforsu karik alin sira hakarak tuir Arte Marsiais treina karik treina didiak atu sai atleta atu Alin sira bele ba rai liur kuandu Alin sira juara ema dada bandeira Timor karik ema hotu kontente maibé karik Alin sira ba tuda malu iha dalan karik ema hotu triste tanba ema nia moris la hakmatek.
