Reportajen Silvino Freitas
Partido Republikanu (PR) kansela kampaña ba eleisaun parlamentár iha Postu Zumalai, munisípiu Covalima no realiza de’it konferénsia imprensa iha eis-otel Dili Lesidere, hodi informa programa prioridade 5 maka hanesan kreditu ho funan laiha, reforma kualidade edukasaun, renunsia pensaun vitalisia no kria kampu traballu 60,000 kada tinan.
Prezidente Partidu Republikanu (PR) João Saldanha hateten, bainhira hetan fiar husi povu hodi ka’er ukun iha preiodu 2023-2028 sei fó kreditu laiha funan ba emprezáriu sira no ba ema sira ne’ebé hakarak sai emprezáriu, iha area agrikultura, manufaktura no turizmu nian ne’e sei laiha kreditu.
“Atu implementa programa ida ne’e PR sei aloka osan tokon 100 iha BNCTL hodi hala’o programa kreditu funan zero ne’e” dehan Prezidente PR João Saldanha liuhusi konferénsia imprensa iha Lesidere Dili,(22/04).
Nia dehan tan, atu hadia kualidade edukasaun iha Timor Leste hahú husi ensinu baziku, sekundária no superior, no iha ensinu superiór iha problema barak liga ba kualidade, joven sira labele hetan servisu tanba laiha kualidade atu kompete ho ema sira gradua iha estranjeiru, tanba ne’e presiza hadia kualidade edukasaun ensinu 3 ne’e iha Timor Leste.
“Ha’u halo universidade ida ami nota katak kurikulum mak lalaos, karik ukun ami hadia muda kurríkulu hanorin nian iha ensinu báziku sekundária no universidade estatál nian” nia promete.
Nia mós promete, karik ukun governante sira husi PR sei renunsia pensaun vitalísia katak la foti osan pensaun vitalísia nian, no osan husi pensaun vitalísia ne’e aloka hikas fali ba iha halo eskola, ospitál, hadi’a estrada no interese povu nian, programa seluk tan mak fahe sertifikadu rai 5000 kada tinan hodi fasilita investimentu ba sidadaun nasionál no estranjéiru hodi loke servisu hasa’e rendimentu ba populasaun sira nian.
“Programa prioridade importante iha governu AMP no plataforma nian maibé sira la halo tanba la hatene halo, programa ne’e maka kria kampu traballu 60,000 kada tinan na joven sira no populasaun ne’ebé presiza” João Saldanha promete tan.
Nia konklui, programa sira ne’e mak povu Timor Leste fó fiar ba PR sei implementa tanba la presiza ema ne’ebé nivel edukasaun aas, maibé ema ne’ebé universidade bele halo importante badinas no iha planu kreativu ho kapasidade timoroan sira di’ak maibé seida’uk iha oportunidade ne’ebé di’ak hala’o servisu sira ne’e.
