Reportajen David da Costa
Partidu Frente Revolucionário Timor-Leste Independente (FRETILIN), hakarak atu ukun, hodi hadia estadu tanba estadu ne’e instituisaun ida-ke boot liu iha rai hotu-hotu, hadia edukasaun no hadia formasaun umana.
Sekretariu Jerál, Partidu Frente Revolucionário Timor-Leste Independente (FRETILIN), Marí Alkatiri, hateten, FRETILIN bainhira ukun hakarak hadia uluk estadu, tanba estadu ne’e instituisaun ida-ke boot liu iha rai hotu-hotu, labele partidu ida iha estadu nia leten, siginfika labele mos ema ida hakarak iha estadu nia leten, ne’e bolu vida institusionál ou kultura institusionál tanba ne’e tenke hadia estadu.
“Ita hakarak ukun atu hadia estadu tanba estadu ne’e instituisaun ida-ke boot liu iha rai hotu-hotu,” dehan Sekretariu Jerál, Partidu FRETILIN Marí Alkatiri, iha Kampaña Daruak Partidu FRETILIN iha Kampu Futebol, Same Vila, Suku Letefoho, Munisipiu Manufahi, Sabadu 22/04.
Nia hatutan Governu tenke hametin unidade para iha dezenvolvimentu ba iha progresu, signifika Governu tenke ninia baze maka meritu krasia no laos Korupsaun Kolusaun no Nepotizmu (KKN), se maka atu ba Governu tenke iha meritu. Nune’e Governu ho Parlamentu hamutuk hodi hametin unidade Nasionál, buka solusaun ba povu nia vida, hadia povu nia vida, ne’e maka FRETILIN sei halo.
“Saida maka solusaun ba povu nia vida? Iha dezenvolvimentu ekonómiku ita tenke hatene objetivu atu ema hotu-hotu bele moris ho ekonomia no moris dignu”, Marí esplika liu tan.
Alende ne’e mós partidu FRETILIN bainhira kaer Governasaun sei tau prioridade ba iha sistema edukasaun, atu nune’e bele eduka labarik sira hotu, no mós FRETILIN sei tau prioriidade mós bai ha formasaun Umana.
