Reportajen Joselina dos Santos
Partidu Unidade Nasionál Demokrátika Rezisténsia Timorense (UNDERTIM), halo Mini-kampaña iha Jardin Largo Lecidere, Prezidente Partidu UNDERTIM Francisco Guterres “Mano Bui” husu ba negosiante ambulante sira, karik sira fó fiar ba partidu UNDERTIM mak ukun sei modifika ba sira nia fatin, labele dada lona maibe tenke halo uma ne’ebé dignu atu vizitante internasional bele mai vizita.
“Karik povu fó fiar ba ami ukun mak ami sei halo uma ne’ebé seguru ba negosiante ambulante sira atu vizitante internasional sira bele sosa sira nia hahan iha Jardin Largo Lecidere hanesan Sidade”, Dehan Prezidente UNDERTIM, Francisco Guterres “Mano Bui” bainhira halo Mini-Kampaña iha Jardin Lecidere, ne’ebé Neon Metin asesu husi Live Streaming jornál elisaun RTTL.ep, tersa 25/04.
Nia hatutan, sira mós sei halo subterânea ba fiu eletrisidade ne’ebé latuir dalan, hanesan Portugal halo labele sidade iha sentral maibé fiu eletrisidade sai rebo-rebo, nune’e tenke halo loos fiu eletrisidade sira ne’e atu labele fó impaktu ba ema nia vida. Nune’e mós UNDERTIM promote banhira ukun, sei servisu hamutuk ho igreja katolika hodi bele lori fila Bispo Dom Martino Lopes nia urna mai Timor-Leste.
“Ami mós sei servisu hamutuk ho relijiaun katolika atu lori fila Urna Bispo Dom Martino Lopes tanba Bispo Dom Martino mak halo mudansa politika ba ita nia rai, iha Meara nia hasoru Xanana Gusmão hodi halo planu atu halo mudansa ba Rai Timor hodi hetan Autodeterminasaun maske liuhosi referendu Nasionál”, Nia informa.
