Reportajen Adroaldo ‘Saretukau”
Relasiona ho informasaun balu ne’ebé espalla katak, Prezidente Kampaña Partidu FRETILIN Postu Hatulia A, Munisípiu Ermera, José das Neves “Samalarua” ho ekipa fahe osan ba komunidade sira iha Postu Hatulia A, Responsavel ne’e klarifika katak informasaun ne’e laloos no la iha faktu, tanba sira ba halo kampaña polítika ko’alia programa Partidu nian, la’os fahe osan.
“Deklarasaun ida ema hatete ne’e puramente falsu, tanba ha’u ba kampaña iha Postu Hatulia ne’e, kampaña polítika ho programa, la’os ba fahe osan, ne’e puramente falsu, partidu fo osan ba halo kampaña, la’os fo osan ba fahe. Kampaña hotu-hotu, subvensaun públika estadu nian fo ba partidu hotu-hotu atu organiza kampaña,” dehan Prezidente Kampaña Partidu FRETILIN Postu Hatulia A, Jose “Samalarua”, wainhira entrevista ho Neon Metin iha Sede Organizasaun RENETIL, Farol, 12/05.
Nia realsa tan katak, nia ba halo kampaña ko’alia programa partidu nian wainhira ba governasaun, la’os ba fahe osan. “Tanba buat ne’e buat falsu ida, buat ne’e ke ema ne’e inventa hosi nia hanoin rasik ou nia rona hosi ema ruma mais ema ne’e inventa tan lia-fuan ne’e, ha’u so hatete de’it katak puramente falsu, artinya sein pursentu falsu, kontra faktu.” Jose “Samalarua” klarifika.
Samalarua hatutan, iha momentu ne’ebá nia rasik la rona direita konabá informasaun ne’e tanba halo hela aktividade kampaña iha Suku Coliati, maibé ema seluk mak rona no nia hatete katak parese sai tan iha media no temi nia naran katak nia fahe osan.
“Sé nia ko’alia hanesan ne’e tenki prova, ha’u fo ba sé, hori bainhira, iha ne’ebé, prova ida ne’e, ne’ebé falsifikasaun ida ne’e afeita ha’u nia personalidade individu i hanesan ema ida ke responsavel iha partidu.” Nia lamenta.
Nia hato’o katak, durante ne’e nia destaka iha Postu Hatulia A, desde inísiu kampaña. Populasaun sira iha ne’eba hatene, katak sira hala’o de’it kampaña tanba ne’e ema ne’ebé hatete “nia tenki responsabiliza nia lia-fuan, responsabilidade polítika, moral, étika moral i responsabilidade seluk kultural, tanba duun matak ema.”
Ikus Responsavel Kampaña Partidu FRETILIN iha Postu Hatulia A ne’e hatete katak fahe osan ne’e la’os materia kampaña maibé “ko’alia ba programa para ida ne’e mak povu hakarak hatene, para halo opsaun, ita ba governu ba kaer ukun, partidu ida ba kaer ukun halo saída ba povu ne’e iha nível baze, suku, aldeia, postu, munisípiu, nível nasional.”
