Reportajen Agustina Amaral
“Halo orasaun ba sira atu ukun ida ukun ho fuan, domin ida ne’ebé Maromak nian no tenki rona povu nia halerik, terus, mukit tanba haree povu barak mak sei halerik ba estrada, ponte, eletrisidade no bee-mos. Ita fiar katak iha tinan Lima ne’e povu hakilar, haksolok, kontene tanba sira nia votus ne’ebé sira fo ne’e la saugati iha tinan lima nia laran”, Domo Virgilio
Selebra loron Corpo de Deus, Sua Eminensia Kardial Dom Virgilio do Carmo da silva husu ba sarani no povu kristaun katólika Timor-Leste tomak tenki hahi, adora, hananu no halo prosisaun ba Maromak, atu nune’e ita sarani nafatin iha espíritu nakono ho Maromak nia Grasa iha nasaun doben ida ne’e.
Atividade ohin loron ne’e feriado nasional, ita nia Governu fo biban ida ne’e mai sarani hotu-hotu no Timor-Leste atu kristaun katólika sira hotu hodi ezerse ita nia liberdade iha loron ida ne’e hodi hahi Maromak oan ne’ebé halo aan ba mane hodi fo isin mai ita no liu husi isin no ran ne’e mak bele komunika mai ita sarani hotu.
“Festa Corpo de Deus festa ida ne’ebé importante tebes, ita hotu agradese ba Maromak tanba nia domin boot ne’ebé ba umanidade hodi halo aan moris iha natureza nian hodi atu ko’alia mai ita atu hatene kona ba Maromak nia Mistériu sira, festa Corpo de Deus ida ne’e hodi halo sarani kristaun sira hotu kontente tebes atu hahi, adora, hananu no prosisaun ba Maromak atu nune’e ita sarani nafatin espíritu nakonu ho Maromak nia Grasa,” dehan Sua Eminensia Kardial Dom Virgildo do Carmo da Silva ba jornalista sira iha Largo Lisedere, Kinta-feira, 08/06.
Tanba saída mak ita hotu hatene loron ohin ne’e loron importante tebes, tanba mistériu ida ne’ebé bolu katak Maromak ida ne’ebé halo sai ema, isin ida ho Jesus Kristu halo ita sai isin ida de’it ho Maromak husi nia isin mak sai fali paun no tua ne’ebé nakfilak ba nia futar isin no ran ba ita han.
Liu husi ida ne’e sai hanesan ai-han espíritu ne’ebé mai ita sarani sira hotu ita, hotu hatene katak ita ema sarani la’os moris de’it husi ai-han maibé moris mos husi Maromak nia liafuan, no espíritu Santu atu nune’e ita nia espíritu ne’e nakonu ho grasas Maromak nian hodi hetan pasénsia hakraik aan, perdua malu no tulun malu iha situasaun saída de’it mak ita sarani sira hotu hasoru iha ita nia moris.
Dom Virgilio mos fo parabéns ba Governu foun no hodi sarani tomak nia naran ohin selebra loron Corpo de Deus, ita sarani hotu fo parabéns ba membru Governu foun sira ne’ebé mak atu kaer ukun iha tinan 5 mai, no mos halo orasaun ba sira atu ukun ida ukun ho fuan, domin ida ne’ebé Maromak nian no tenki rona povu nia halerik, terus, mukit tanba haree povu barak mak sei halerik ba estrada, ponte, eletrisidade no bee-mos. Ita fiar katak iha tinan Lima ne’e povu hakilar, haksolok, kontene tanba sira nia votus ne’ebé sira fo ne’e la saugati iha tinan lima nia laran.
