RENETIL iha membru barak maibe laos membru hotu-hotu hatudu nia militansia iha luta ba ukun rasik an nian. Eduardo Filomeno Vaz ho naran kodigo Malaka durante nia tempu tomak estuda iha Indonesia sempre hatudu nia militansia ba luta ukun rasik an ninian.
Eduardo, ho naran badak Edu, konsege liu teste hodi tama Universidade Estatal Indonesia nian, Universidade Brawijaya Malang, no halo nia estudu iha area Engenharia Eletro-Mecanica iha 1994. Hanesan joven Timor-oan barak iha tempu ne’eba, hakat ba Indonesia laos deit atu estuda ka sai estudante diak tuir versaun governo Indonesia nian maibe mos atu kontinua hatutan luta ba ukun rasik an nian. Edu mak nudar joven estudante ida ne’ebe hakat ba estuda iha Indonesia ho hanoin ida ne’e.
Naturalmente estudante hotu-hotu ne’ebe eskola iha rai sira Indonesia hola parte ka sai nudar membro ba asosiasaun estudantil nian. Iha Provinsia Jawa Leste, iha sidade Malang, Edu hola parte iha asosiasaun estudantil IMPETTU (Ikatan Mahasiswa dan Pelajar Timor-Timur). Organizasaun ida ne’e loloos ne’e hamrik atu halibur joven estudantil sira ba interesse politik governo Indonesia nian, ka sai fatin ba governo Indonesia atu controla Timor-oan sira mak estuda iha Malang.
Maibe Edu hamutuk ho nia colega sira ho liderança Mariano Asanami (agora dadaun nudar Vice Premmeiru Ministru) dudu atu IMPETTU sai nudar espasu ba hatutan luta ukun rasik an nian. Iha asosiasaun ida ne’e nia laran mak Edu rekrutadu sai nudar membro RENETIL. Ida ne’e akontese tanba IMPETTU rasik lidera hosi membro RENETIL sira.
Tinan ida deit iha Malang, Edu hatudu tiha ona nia militância ba luta ukun rasik an nian. Iha inisiu fulan Dezembru 1995, loloos ne’e Edu hamutuk ho nia colega sira tenke tama eskola iha tempu ne’eba maibe Edu kumpri lian haklaken RENETIL nian, “antes sem titulo do que sem pátria”, nia hakat ba Jakarta, kapital sidade Indonesia nian, ho planu atu halo protesta hasoru governo Soeharto nian kona ba invazaun Indonesia iha Timor-Leste.
Iha momentu ne’eba Edu hetan captura hosi militar Indonesia nian iha Hotel Presidente nia oin, iha Jakarta. Hafoin captura militar Indonesia lori ba halo interogasaun no detein nia durante loron 2 nia laran. Maibe ida ne’e la halo Edu tauk, tan nia hatene katak qualker aktu militância ida sei hasoru risku, inklui lakon previlijeu bolsu estudu nian, no mos hetan kanek ka hetan oho.
Fulan Jullu 1996 akontese demonstrasaun trabalhador nian ida ne’ebe bot tebes iha Tandes, Surabaya. Demonstrasaun ida ne’e hatun trabalhador 20 mil resin no lidera hosi feto brani ida hosi Pusat Perjuangan Buruh Indonesia (PPBI), Dita Indah Sari. Iha demonstrasaun ne’e Dita hetan kaer no kastigu. Demonstrasaun ba asuntu hanesan halo iha Malang ne’ebe envolve barak liu estudantes pro-demokrasia inklui estudantes Timor-oan sira iha Malang. Nudar asaun solidariedade estudantes Timor-Leste nian, saudozu Edu hamutuk ho nia kompaneiru sira seluk, inklui Arsenio Pereira (agora dadaun nudar Sekretariu Estadu Kooperativa) hakat hosi Malang ba Surabaya hodi ba halo asaun solidariedade iha tribunal Surabaya nian ba Dita Indah Sari mak hetan kaer no halao hela prosesu justisa.
Maibe laos ida ne’e deit, Saudozu Edu ativu tebes iha asaun sira mak halao iha Malang. Kuaze tinan-tinan estudantes Timor-oan sira iha Malang sempre halo asaun iha Gedung DPRD Malang nia oin hodi komemora Loron Masakre Santa Cruz, 12 Novembru ka asaun ruma atu denunsia asaun militar Indonesia nian iha Timor. Iha demonstrasaun sira ne’e maioriaparte Edu sempre marka prezensa.
Edu nia ativismo ba ukun rasik an nian nunka para. Nia hanoin bot liu nia isin rasik. Edu sempre marka prezensa iha asaun sira RENETIL organiza. Iha 25 Marsu 1997, Edu hamutuk ho nia kompaneiru RENETIL na’in 32 seluk haksoit tama iha Embaixada Austria hodi hato’o ejijensia ba Indonesia atu fo liberdade ba Timor-Leste atu hili nia independencia no liberta lider Resistencia Kay Rala Xanana Gusmao. Hafoin demonstrasaun iha embaixada Austria nian polisia Indonesia captura Edu ho nia kompaneiru sira. Lori sira ba halo interogasaun no kastigu durante semana ida iha sela Polda Metro Jaya-Jakarta Pusat.
Kompaneiru Edu Malaka fo duni nia an tomak ba luta ukun rasik an nian. Nia halao duni estratégia funu nian mak RENETIL trasa ona katak demokrasia iha Indonesia mak dalan ba ukun rasik an Timor-Leste nian ka ukun rasik an Timor-Leste nian mak sei fo demokrasia ba Indonesia. Edu aplika ida ne’e liu hosi participa ativu iha asaun sira seluk mak organiza hosi organizasaun estudantes Indonesia nian iha kampus no mos iha sidade Malang.
Kompaneiru Saudozu Edu Malaka la konsege halo hot unia eskola tuir tempu. Iha 1999, dala ida tan Edu kumpri nia dever nudar militante RENETIL hodi fila hikas mai Timor-Leste hodi kontinua haklaken lia los ukun rasik an nian hamutuk ho nia kompaneiru sira seluk. Nia eskola interompidu tiha no konsege halo hot unia estudo iha 2002.
Hafoin halo hotu Edu nia estudu fila hikas mai Timor-Leste hodi kontinua luta seluk ida hodi hakonu promesas luta pasadu nian. Saudozu Edu hahu ho hanorin iha Politeknik Hera depois halao nia knar Profesional iha Timor-Telecom nudar tekniku espesialista durante tinan 20 nia laran.
Eduardo Filomeno Vaz “Malaka” moris iha Baucau, 12 Fevereiru 1973. Saudozu Edu Malaka husik iis iha mundo iha loron 13 fulan Setembru 2023 husik hela oan feto nain rua, Raquel Angel Tilman Vaz (Raquel), tinan 19, agora estuda iha Universidade Católica Timorense (UCT) no Queila Graça Tilman Vaz (Luna), Tinan 15, escola iha Ensino Secundario Canossa.
