Reportajen David da Costa
Presidente Repúblika José Ramos-Horta, hateten, nia apoiu ba Xefe Suku feto, tanba feto iha reprezentasaun suku kiik liu iha Timor-Leste, tanba nia husu ba Elitores sira iha Timor-Leste, iha 28 Outubru 2023 atu vota ba kandidatu xefe suku feto sira.
“Ha’u nia apoiu mak Xefe Suku feto, tanba feto iha reprezentasaun suku kiik liu iha Timor-Leste tomak. Ne’e duni ha’u apelu ba eleitór sira iha Metiaut, iha fatin-fatin hotu favor vota ba feto ida ba Xefe Suku,” dehan Presidente Repúblika José Ramos-Horta, ba jornalista sira iha Palásiu Prezidensiál Bairo-Pite, Segunda 23/10.
Xefe Estadu esplika, mane xefe suku sira ne’ebé maka nia koñese balun di’ak loos, nia sempre ajuda sira, no sira mós servisu di’ak loos, balun iha Quelicai ne’ebá, mas feto uitoan liu, labele entaun tenke hili feto.
“Eleisaun suku ne’e, ha’u nia esperasa mak ita haree númeru Xefe Suku feto haksoit ba oin barak pelumenus sei to’o 50% ha’u kontente ona,” Xefe Estadu nia esperansa ba kandidatu xefe suku foun.
Tuir dadis Ofisial Supervizaun Eleitorál (OSE) husi Komisaun Nasionál Eleisaun (CNE) destaka ba iha suku sira iha Timor-Leste, kandiatu Xefe Suku hamutuk 2.117 ne’ebé kompostu husi feto 241 (11,38%) no mane hamutuk 1.876 (88,62%).
