Reportajen Agustinha Amaral
Ministériu Agrikultura Pekuária, Peska no Floretsa (MAPPF) konvida alumni Arava International Center for Agriculture Training (AICAT-Singla Inglés) ne’ebé tuir formasaun agrikultura iha nasaun Israel, hodi hato’o sira nia progresu servisu inklui obstákulu mak sira hasoru iha aktividade ortikultura ne’ebé sira implementa iha Timor-Leste.
Sekretáriu Estadu Pekuária, José Veira de Araújo hateten, ita Timor mos iha poténsia barak, kiak iha finasiamentu maibe riku ein termus ekonomikamente tanba fatin barak sedauk utiliza hodi halo produsaun.
“Ita Timor mos iha pontensial ne’ebé boot tebes hanesan ita nia rai ita iha bee, ita iha rikusoin barak los, finansiamentu ita kiak maibe ekonomikamente ita riku tanba ita nia rai barak ita la utiliza tanba ne’e matenek ne’ebe sira hetan iha Israel, sira bele lori fali mai ne’e para oinsá atu investe”, dehan Sekretáriu Estadu Pekuária, José Veira de Araújo iha salaun MAPPF, Comoro 07/11.
Sekretáriu Estadu ne’e esplika, durante ne’e ita depende demais ba fundu mina rai ne’ebé ita buka medidas atu foti osan fundu mina hodi halo produsaun ba área produtivu liu-liu ba parte agrikutura, pekuária, peskas nomos floresta.
“Tanba ne’e mak ita konvida alumni AICAT sira mai iha ne’e atu fahe matenek sira ne’ebé sira hetan, atu nune’e ita bele alarga tan iha ita nia nasaun Timor-Leste.”
Sekretáriu Estadu Pekuaria, husu ba alumni AICAT sira atu hatudu nafatin sira nia komitmentu hodi hanorin komunidade sira hodi dezemvolve setor produrivu no hasa’e kresimentu ekonomia.
“Ita boot sira tenke iha komitmentu hodi hamorin ita nia rai, uluk MAP iha kotuk maibé agora governu ida ne’e hakarak atu desenvole setor produtivu sira ne’e hodi hasa’e kresimentu ekonomia, dala barak ita dehan menus kampu servisu mas agora rai barak mak abandonadu no nune’e atu dezenvolve rai ne’e sai produtivu mak presiza joven sira nia produtividade, tanba nasaun ida nee iha hotu ita nia kabaas,” nia enkoraja.
Nia dehan, joven balun iha inisiativa hodi kria negósiu rasik no agora oinsá para joven sira iha boa vontade, tanba governu prontu apoiu, tanba ne’e tenki organiza malu hodi hamosu rasik inisiativa iha setor produtivu sira, no ita mos iha parseiru ne’ebé hakarak apoiu ita.
“Imi tenke iha planu di’ak nune’e, prontu hodi buka merkadu no fornese direita, lalika hanoin exportasaun maibé responde uluk lai demanda lokal no nasional iha rai laran, Ministériu sei apoiu mas tenke iha boa vontade no Timor mak partisipa ativu iha AICAT nian nune’e labele husik leet de’it esperiénsia ne’ebé hetan ona, Israel ne’e uluk rai maran mas sira dezenvolve setor produtivu no fiar imi nia prezensa iha nee bele aplika iha Timor.” Nia enkoraja liutan.
Iha fatin hanesan Diretor Nasional Agríkola, MAPPF, Hipolito Costa, hateten, konvida alumni AICAT halo enkontru jeral ne’e hodi halo aprejentasaun sira nia progresu atividade.
“Ami konvida alumni AICAT halo enkontru jeral, hamutuk na’in 300 resin no sira sei aprezenta sira nia atividade iha forum ne’e durante loron rua, ita alumni AICAT hamutuk na’in 300 resin kompostu feto no mane sei aprezenta iha forum Ida ne’e durante loron rua nia laran, maibé partisipa iha ne’e alumni AICAT na’in 100 resin deit,” dehan Diretor Hipolito.
Nia hateten, objetivu hosi enkontru ne’e, oinsá hodi hatene tuir saída mak sira halo agora, iha munisípiu sira depois de sira aprende formasaun iha Israel.
Nia dehan, Ministru orienta nia hodi realiza enkontru ne’e, nia husu atu forum loron rua tenki foku, tanba ida ne’e fo biban ba sira hodi hato’o hanoin no obstákulu durante ne’e mak sira hasoru iha atividade ortikultura.
