Reportajen David da Costa
Prezidente Repúblika (PR) José Ramos-Horta ohin fó tomada de posse ba Embaixadór foun Timor-Leste ba nasaun Portugál hodi troka Embaixadora Tuan Isabel Amaral Guterres, tanba Embaixadora tuan nia mandatu remata ona.
Sekretáriu Jerál, Ministru Negosiu Estranjeiru no Kooperasaun (MNEK), Juvêncio de Jesus Martins, hateten, Prezidente Repúblika (PR) José Ramos-Horta ohin fó posse ba Embaixadór foun Timor-Leste ba Portugál Manuel Serrano hodi troka Embaixadora Tuan Isabel Amaral Guterres tanba nia mandatu remata ona.
“Ohin 27 Novembru 2025, ita hala’o tomada de posse ba ita nia Embaixadór foun Manuel Serrano ba subtitui ka troka ita nia Embaixadora Tuan, Isabel Amaral Guterres ne’ebé hala’o tiha ona ninia kna’ar hanesan Embaixadora Timor nia iha Portugál, besik tinan lima,” dehan Sekretáriu Jerál Ministru Negosiu Estranjeiru no Kooperasaun (MNEK), Juvêncio de Jesus Martins, ba jornalista sira iha Palásiu Prezidensiál Bairu-Pite, 27/11.
Nia haktuir, Embaixadór foun ohin tomada de posse nia sei ba hatutan fali saida mak Embaixadora tuan Isabel Amaral Guterres hala’o iha Portugál, ida ne’e mós Embaixadór foun konserteja nia sei iha planu foun karik, nu’udar Embaixadór Extra-ordinariu Plenu Potensináriu Timor nia ba Portugál nia sei ba hala’o iha Portugál hodi reprezenta Timor-Leste iha nasaun Portugál.
“Ita boot sira hatene katak Portugál ba Timor ne’e espesiál tebe-tebes ba ita, tanba durante rezisténsia Portugál nunka husik ita, nia sempre aprejenta nia an hanesan potensia administrante ne’ebé kaer metin nafatin ita nia kauza ba ukun rasik-an,”nia subliña.
Nune’e, Portugál ninia estatutu ba Timor-Leste hanesan espesiál tebe-tebes nune’e eskolla Timor nia governu liu husi Prezidensia Repúblika atu ba hala’o kna’ar iha Portugál.
“Ita hotu fiar katak, ita nia Embaixadór Manuel Serrano sei ba halo ninia kna’ar iha Portugál,” nia afirma.
Iha fatin hanesan Embaixadór foun Timor-Leste ba Portugál, Manuel Serrano mos hateten, Hanesan Embaixadór foun ba fó de’it kontinuidade ba servisu sira ne’ebé iha ona, no haree mós ba programa estratéjiku kooperasaun ne’ebé iha entre país rua ne’e iha.
“Ho nune’e ita bele hametin liu tan ita nia relasaun diplomátika haburas kooperasaun iha área sira ne’ebé iha tuir orientasaun governu nian, no tuir programa estratéjiku ne’ebé define ona entre 2024 to’o 2028,” nia dehan.
Nia haktuir, programa ne’ebé ezisté Embaixada halo fó komunidade, pur ezemplu ba iha kapasitasaun dezenvolvimentu umanu ba setór relevante mós tau atensaun ba asuntu konsoladu ne’ebé liga ho sidadaun sira iha diaspora, ida ne’e misaun importante ne’ebé Embaixada presiza haree.
Tanba ne’e, sidadaun Timorense iha ne’ebé de’it, importante mak buka atu respeita uluk lei ne’ebé vigora iha iha Portugál. Hanesan mós ema estranjeiru sira servisu iha Timor-Leste oinsá sira kumpri, no hakruuk ba lei sira ne’ebé vigora iha Timor-Leste.
“Konserteja katak embaixada liu husi Diplomata lae adidu ne’ebé designadu ba iha asuntu ida ne’e sei fó atensaun di’ak nune’e bele haree oinsá ba oin. Ha’u sei rekolla di’ak informasaun klean kona-ba asuntu refere,”nia esplika.
Nia dehan, Prezidente Repúblika, José Ramos Horta depozita konfiansa ba nia atu hala’o kna’ar ida ne’e, tanba antes mós hetan kna’ar hanesan Embaixadór Timor-Leste ba Indonézia, agora ida ne’e segundu kargu ba fali Embaixadór Portugál.
Nune’e mos Embaixadór foun Manuel Serrano Agradese ba governu no esatadu ne’ebé maka fo ona konfiasa hodi sai Embaixadór foun ba iha Portugál.
