Reportajen Silvino Freitas
Relasiona ho traballador sira neebe kontinua hetan asidente iha area peska nian maka Sekretariu Estadu Formasaun Professional Empregu (SEFOPE) koordena ona parte FALINTIL Forsa Defeza Timor Leste (F-FDTL) iha area Naval no Polisia Nasional Timor Leste (PNTL) iha Polisia Maritima nian atu fasilita formasaun ba kandidatu traballador iha area peska nian neebe atu ba servisu iha Korea Sul.
SEFOPE Rogerio Araujo Mendonça dehan, nia parte hanesan sekretariu estadu orienta ona diretor jeral SEFOPE halo ona komunikasaun ho F-FDTL parte naval nian nunee mos Unidade Polisia Maritima nian atu bele fasilita formasaun ba traballador sira neebe hetan kontratu kompana iha Korea Sul nian neebe espesifikamente area peska nian, nunee antes sira atu halao servisu iha Korea tenke iha esperensia atu uza sasan sira iha tasi-laran.
“Nuudar sekretariu estadu orienta ona diretor jeral halo ona komunikasaun ho FFDTL parte naval nian no polisia naval parte UPM atu fasilita formasaun ba kandidatu sira neebe hetan ona kontratu sira tenke hetan formasaun minimal semana ida nia laran atu bele hatene uza ekipamentu iha tasi laran” dehan SEFOPE Rogerio Araujo Mendonça ba jornalista sira iha City 8 Dili, (09/03).
Nia dehan tan, formasaun ba kandidatu sira nee sei realiza iha fulan oin tanba husi parte SEFOPE sei hein lista naran sira neebe liu ona selesaun atu ba servisu iha Korea Sul, nunee lista sira nee hetan ona maka sira sei halo publikasaun, entretantu parte SEFOPE nafatin husu ba traballador sira neebe hetan oportunidade husi governu atu lao tuir komprimisiu husi deklarasaun neebe asina entre traballador familia traballador no governu neebe evita involve an iha krime sira liuliu liga ho arte marsial.
“Tanba sira atu sai husi timor ba servsiu iha nasaun neebe deit sira iha komprimisiu asina deklarasaun entre traballador, familia no governu entaun kuandu hetan aktu sira hanesan ba governu sei la tollera ba traballador sira neebe komete krime sira hanesan nee” konklui SEFOPE Rogerio Araujo Mendonça.
