Reportajen David da Costa
Governu lansa oficialmente konstrusaun Timor-Leste International Convention Centre (ICC), ne’ebé konsidera hanesan símbolu ida ba dezenvolvimentu nasionál no kompromisu Timor-Leste nian atu hametin integrasaun rejionál liuhosi ASEAN, no prepara-an atu simu eventu internasionál importante sira, inklui Simeira ASEAN iha tinan 2029.
Primeiru Ministru (PM), Kay Rala Xanana Gusmão konsidera lansamentu bá konstrusaun Timor-Leste International Convention Centre (ICC) nu’udár símbolu bá dezenvolvimentu nasionál hodi prepara bá eventu internasionál Simeira The Association of Southeast Asian Nations (ASEAN) iha tinan 2029. Tanba iha visita Primeiru Ministru Malázia, Anwar Ibrahim, iha Setembru 2024, diskute adezaun Timor-Leste ba ASEAN no preparasaun atu assume prezidénsia iha futuru.
“Primeiru Ministru Malázia, Anwar Ibrahim mai iha ne’e ami ko’alia kona-bá adezaun TL bá ASEAN. Ko’alia kona-bá posibilidade ita assume prezidénsia iha futuru. Iha fatin ne’e kedan ita lansa vizaun ida-ne’e atu harii sentru konvensaun internasionál. Projetu ne’e nu’udár vizaun IX Governu Konstitusionál nian atu prepara TL simu responsabilidade rejionál iha futuru,” dehan Primeiru Ministru, Kay Rala Xanana Gusmão, iha Portu Dili, kuarta 20/05.
Iha momentu ne’ebá kedan, Sekretariadu ASEAN nian hamutuk ho nasaun membru sira espressa sira-nia vontade tomak atu fó apoiu másimu bá TL ninia preparasaun hodi assume responsabilidade iha futuru.
Iha fatin hanesan Sekretáriu Jerál ASEAN, Kao Kim Hourn hato’o parabéns bá Governu no povu TL ne’ebé inisia projetu importante ida ne’e.
Kao Kim Hourn konsidera serimónia ne’e la’ós de’it marka ida iha dezenvolvimentu infraestrutura, maibé hanesan reflesaun ida hosi kompromisu kontínua TL nian bá dezenvolvimentu nasionál, dezenvolvimentu internasionál no integrasaun rejionál.
Sentru Konvensaun Internasionál sei sai hanesan plataforma ida bá diálogu, parseria, integrasaun rejionál no nia fiar katak sei sai fatin markante ida bá kooperasaun no envolvimentu internasionál.
“Ha’u mós iha esperansa katak projetu ida ne’e sei apoia TL nia aspirasaun dezenvolvimentu bá tempu naruk no hametin fundasaun sira bá kresimentu sustentável, oportunidade ne’ebé lu’an liu no konektividade rejionál bo’ot-liu,” Sekretáriu Jerál ASEAN espresa.
Iha ninia observasaun, projetu ida-ne’e refleta TL nia vizaun bá futuru no kompromisu bá involvimentu ASEAN ne’ebé kle’an liu.
Projetu ne’e responsabiliza hosi Vise Primeiru Ministru no Ministru Koordenadór bá Asuntus Ekonómikus no Ministru Turizmu no Ambiente, Francisco Kalbuadi Lay ho membru Governu tuteladu sira.
Konstrusaun bá projetu ne’e ezekuta hosi Kompañia Internasional hosi Xina, Shaanxi Constrution Engineering Group Coporation Limited Premium Project ne’ebé sei la’o durante tinan rua no sei finaliza iha 20 Maiu 2028.
Partisipa iha lansamentu konstrusaun ne’e reprenzentante Governu Indonézia ho Governu Austrália no mós membru IX Governu Konstitusionál, membru Parlamentu Nasionál no konvidadu importante sira seluk no funsionáriu públiku sira.
