Hakerek nain Celestino Gusmão Pereira, peskizadór iha La’o Hamutuk

Artigu ida ne’e hakerek iha relasaun ho proposta Orsamentu Jerál Estadu (OGE) Retifikativu 2026 ne’ebé Governu submete no Parlamentu Nasionál aprova ona, submete ba promulgasaun prezidensial hodi responde ba impaktu husi tensaun no konflitu internasionál iha Médiu Oriente, ne’ebé afeta merkadu globál enerjia no alimentár. Konfltu ida ne’e mós iha destruisaun barak halo terus no halakon povu iha Iraun, Lebanon no Palestina sira nian vida.

Instabilidade iha presu petróleu, transporte marítimu no kadeia abastesimentu internasionál afeta diretamente nasaun sira ne’ebé depende maka’as ba importasaun, liu-liu iha Azia, tanba rejiaun ne’e depende ba petróleu liu ba iha tasi-leet Hormuz inklui Timor-Leste. Situasaun ida ne’e hatudu vulnerabilidade estruturál ida ne’ebé durante tinan barak seidauk hetan atensaun sufisiente, liuliu dependénsia boot ba gazoel, ai-han importadu no osan husi Fundu Petrolíferu.

Krize globál atuál la’ós de’it problema temporáriu, maibé nudár oportunidade importante ida atu Timor-Leste reflete kle’an kona-ba diresaun dezenvolvimentu nasionál no prioridade polítika no ekonómika sira ba futuru.

La’o Hamutuk rekoñese katak Governu no Parlamentu Nasionál iha responsabilidade atu adopta medida emerjénsia ne’ebé nesesária hodi proteje povu no estabilidade nasionál bainhira risku globál aumenta. Maibé, resposta iha kurtu prazu tenke akompaña ho reforma estruturál ne’ebé bele hamenus vulnerabilidade Timor-Leste ba krize enerjia, ai-han no ekonomia iha futuru.

Krize Globál no Vulnerabilidade Estruturál Timor-Leste

Agora, ekonomia Timor-Leste depende maka’as ba importasaun kombustivel, alimentár no nesesidade konsumsaun sira seluk. Bainhira presu petróleu sa’e iha merkadu globál ka kadeia abastesimentu internasionál interrompe, impaktu direta ba eletrisidade, transporte, presu merkadoria no kustu moris.

Situasaun ida ne’e hatudu katak Timor-Leste seidauk iha soberania enérjetika no alimentár ne’ebé forte. Osan husi esportasaun petróleu uza atu sustenta importasaun no konsumsaun, enkuantu baze produtiva nasionál seidauk reziliente atu responde ba krize globál.

Realidade ida mós reflete EDTL depende besik 100% ba kombustivel fosil ba produsaun eletrisidade no iha 2023, EDTL gasta tokon $107 ba kombustivel. Iha 2024, tokon $112 enkuandu informasaun, dadus no relatoriu 2025 seidauk disponivel. kada tinan ba gazoel importadu. Iha parte seluk, relatóriu IPC nota katak produsaun ai-han lokál seidauk sufisiente atu responde ba demanda doméstika atu sustenta nesesidade Povu tomak, no parte boot nesesidade konsumsaun ai-han kontinua depende ba importasaun. Dadus hirak ne’e hatudu katak vulnerabilidade enérjetika no alimentár la’ós de’it risku teóriku, maibé realidade estruturál ne’ebé presiza resposta estratéjika no sustentável.

Dependénsia ida ne’e la’ós de’it problema tékniku no orsamentál, maibé liuliu kona-ba modelu dezenvolvimentu ne’ebé durante tinan barak fó prioridade boot ba konsumsaun, importasaun no infraestrutura ne’ebé la hametin produsaun lokál no ekonomia produtiva.

Krize atuál mós hatudu katak vulnerabilidade ekonómika bele transforma ba kestaun seguransa nasionál. Nasaun ne’ebé depende ba ai-han no kombustivel husi rai li’ur nafatin sei vulneravel ba instabilidade globál no presaun esterna.

Inseguransa Alimentár no Dezafiu Produsaun Lokál

Maske maioria populasaun Timor-Leste depende ba agrikultura, produtividade agríkola nasionál kontinua ki’ik. Agrikultór sira enfrenta dezafiu hanesan falta irrigasaun apropriadu, difikuldade armazenamentu, no apoiu tékniku ne’ebé seidauk sufisiente.

Iha tempu hanesan, kadeia valór lokál seidauk forte. Produtór sira dala barak enfrenta difikuldade iha prosesamentu, embalajen no asesu ba merkadu. Ida ne’e halo produsaun lokál difisil atu kompete ho produtu importadu.

Realidade ida ne’e importante tanba seguransa alimentár la’ós de’it kona-ba disponibilidade alimentár iha merkadu maibé kapasidade povu no nasaun ida atu prodús, distribui no sustenta nian an rasik iha maneira sustentável ho soberania ai-han.

Timor-Leste presiza harii sistema alimentár nasionál ne’ebé liga produsaun lokál ho merkadu lokál, programa kompra públika- sosa produtu lokál, eskola, ospitál no setór turizmu. Bainhira Estadu fó prioridade ba produtór lokál, produsaun lokál bele aumenta rendimentu uma-kain sira iha área rurál, redús importasaun no hametin ekonomia nasionál.

Mudansa Klimátika no Sustentabilidade Ambientál

Mudansa klimátika aumenta tan vulnerabilidade Timor-Leste nian. Rai maran, inundasaun, udan la bele antisipa, erozaun no bee menus afeta diretamente produsaun agríkola no komunidade rurál sira nian moris.

Tanba ne’e, soberania alimentár no enérjetika tenke liga ho sustentabilidade ambientál. Agroekolojia, konservasaun bee no rai, reflorestasaun no reziliénsia klimátika komunitária importante atu dezenvolve sustentabilidade produsaun iha futuru.

Enerjia Renovavel no Soberania Enérjetika

Dependénsia boot ba gazoel importadu halo Timor-Leste vulneravel ba presu petróleu no krize globál. Tanba ne’e, enerjia renovavel presiza sai prioridade estratéjika nasionál.

Enerjia solar, mini-grid rurál no efisiénsia enérjetika bele ajuda hamenus dependénsia ba kombustivel importadu, redús kustu iha tempu naruk no aumenta asesu eletrisidade iha nasaun tomak.

Tranzisaun ba enerjia renovavel presiza tinan balu. Maibé, kada orsamentu anuál bele hahú investimentu graduál ne’ebé orienta Timor-Leste ba soberania enérjetika ne’ebé sustentável.

Modelu Dezenvolvimentu no Reforma Estruturál

Timor-Leste bele uza krize globál atuál atu reflete kona-ba modelu dezenvolvimentu nasionál. Durante tinan barak, ekonomia nasionál depende maka’as ba reseita petróleu, importasaun no despeza konsumtiva – despeza balun ne’ebé uza de’it falta iha maneira investimentu.

Husi perspetiva La’o Hamutuk, osan husi esportasaun rekursu petróleu ne’ebé limitadu tenke uza ho prudénsia atu harii kapasidade produtiva nasionál, la’ós mantén dependénsia ba importasaun no konsumsaun. Nune’e, rekursu temporáriu tenke uza ho prudénsia atu prepara ekonomia sustentável ba jerasaun futuru.

Timor-Leste presiza orienta nian dezenvolvimentu ba ekonomia produtiva ne’ebé valoriza agrikultura, peska no agroindústria liu kooperativa, empreza ki’ik no médiu lokál,.

Juventude, Edukasaun no Futuru Nasionál

Juventude Timor-Leste iha papél importante ba soberania ekonómika nasionál. Maibé, sistema edukasaun atuál seidauk prepara sufisientemente juventude ba produsaun lokál, enerjia renovavel, agroindústria no emprendedorizmu produtivu.

Universidade no institutu sira presiza sai sentru inovasaun no peskiza aplikada atu ajuda responde ba problema reál Timor-Leste nian. Juventude tenke hetan no kaer oportunidade konkreta iha agrikultura, prosesamentu alimentár, teknolojia no promove produtu lokál iha merkadu. 

Mudansa mentalidade mós importante. Timor-Leste presiza muda graduál husi kultura dependénsia no konsumtiva ba kultura produtividade, sustentabilidade no solidariedade sosiál.

Papél Orsamentu Jerál Estadu no Prioridade Fiskál

OJE tenke sai instrumentu estratéjiku atu redús vulnerabilidade nasionál. Resposta emerjénsia ba krize globál bele nesesária iha kurtu prazu, maibé resposta ida ne’e tenke transparente, temporária no ligada ho reforma estruturál ba tempu naruk.

Se OJE kontinua fó prioridade boot ba importasaun no konsumsaun, dependénsia estrural ba enerjia fosil, importasaun no nesesidade relevante sira sei kontinua. Maibé, se OJE investe ba irrigasaun apropriadu, armazenamentu alimentár, enerjia renovavel, konservasaun bee, saúde, edukasaun téknika, agroindústria no infraestrutura rurál produtiva, krize atuál bele sai oportunidade atu hametin soberania ekonómika nasionál.

Tanba ne’e, OJE retifikativu bele loke debate kona-ba situasaun atuál, OJE 2027 no planeamentu fiskál sira tuir mai tenke konsidera vulnerabilidade Timor-Leste ba krize globál enerjia no alimentár hanesan prioridade estratéjika nasionál. Governu no Parlamentu Nasionál presiza diskute no aprova medida konkretu atu hamenus dependénsia ba diesel no alimentár importadu 

Orsamentu sira tuir mai tenke hatudu pasu klaru ba enerjia renovavel, produsaun lokál, irrigasaun, armazenamentu alimentár, kompra públika husi produtór lokál, agroindústria rurál, peska sustentável, edukasaun téknika no infraestrutura produtiva iha munisípiu sira.

Planeamentu orsamentál mós presiza inklui mekanizmu monitorizasaun no avaliasaun kona-ba oinsá despeza públika ajuda redús vulnerabilidade nasionál. Ida ne’e importante atu asegura katak orsamentu la’ós de’it responde ba krize, maibé mós prevene impaktu husi krize iha futuru liu husi harii kapasidade produtiva, soberania alimentár, soberania enérjetika no reziliénsia ekonómika nasionál.

Konkluzaun

Krize globál enerjia no alimentár atuálmente revela realidade importante ida: Timor-Leste seidauk iha soberania ekonómika ne’ebé forte. Dependénsia ba diesel, alimentár importadu no Fundu Petrolíferu halo nasaun vulneravel ba instabilidade internasionál.

Maibé, krize ida ne’e mós bele sai oportunidade atu Timor-Leste redefine nian diresaun dezenvolvimentu ba modelu ne’ebé soberanu, sustentável, produtivu no reziliente liu.

Resposta efetivu ba vulnerabilidade nasionál la’ós de’it aumenta importasaun ka responde temporariamente ba krize. Resposta efetivu mak harii kapasidade atu prodús, fó-han, sustenta no prepara futuru ne’ebé sustentável ba jerasaun sira tuir mai.

Vulnerabilidade ida ne’e presiza sai parte permanente husi debate orsamentál no planeamentu nasionál, liu liu iha OJE 2027 no orsamentu sira tuir mai. Se Timor-Leste hakarak enfrenta krize globál ho dignidade no seguransa, presiza investe hahú agora iha soberania ekonómika, enerjia renovavel no produsaun lokál ne’ebé bele sustenta povu no jerasaun futuru.

Nudár referénsia no informasaun no dadus detallu liu tan bele hetan husi La’o Hamutuk nian submisaun (https://www.laohamutuk.org/econ/OGE26/OR/260521LHsub%20OGE%20retifikativu%202026.pdf) no material relevante ne’ebé La’o Hamutuk halibur ida ne’e; https://www.laohamutuk.org/econ/OGE26/25OGE26.htm#OR