Reportajen Silvino Freitas
Instituto Nasionál Dezenvolvimento Mão de Obra (INDMO) sei organiza kompetisaun nasionál abilidade ba dala 9 no kompetisaun internasionál amigavel ba abilidade Timor Leste ba dala rua, nune’e partisipasaun husi kompetisaun ne’e delegadu husi nasaun 8 inklui TimorLeste no iha delegasaun nasaun rua nian maka hanesan observador, entretantu kompetisaun refere passu importante atu haforsa imajen Timor Leste nian no formasaun professionál ho kualidade no konstrusaun ekonomia ne’ebé produtivu.
Diretora Executivu INDMO Isabel Fernandes de Lima dehan, kompetisaun tinan ida-ne’e sei halibur partisipante nasionál no delegadu internasionál sira, ne’ebé envolve nasaun partisipante ualu, inklui Timor-Leste, nasaun sira husi Pasífiku no nasaun parseiru husi Sudeste Aziátiku, ne’ebé rejista ona sira-nia kompetidór no peritu/júri sira, nune’e nasaun Pasífiku sira mak Fiji, Nauru, Papua-Nova Guiné, Samoa, Tonga no Vanuatu, enquanto nasaun parseiru husi Sudeste Aziátiku mak Indonézia no Malázia, aleinde nee mos iha edisaun ida-ne’e mós sei konta ho partisipasaun delegadu husi Ilhas Salomão no Tuvalu hanesan nasaun observadór de’it.
“Komisaun Organizador estima katak sei iha partisipasaun husi besik delegadu internasionál na’in 60, kompetidór na’in 36 (nasionál na’in 22 no internasionál na’in 14), peritu/júri na’in 41 (nasionál na’in 23 no internasional na’in 15), no vizitante nasionál no internasionál na’in 1.000 resin durante loron sira eventu nian” dehan Diretora Executivu INDMO Isabel liuhusi konferénsia imprensa iha ne’ebé halo iha INDMO Rua Komunal Bairo-Pite, (29/06).
Nia dehan tan, edisaun 2026 sei hala’o iha kategoria profisionál haat mak Instalasaun Elétrika, Tein, Servisu Restaurante, Soldadura, nunee husi kompetisaun sira sei hala’o iha sentru formasaun profisionál sira iha Díli – Centro Frormação Dom Bsoco Comoro [kategoria a), b) no c)] no Likisá – CNEFP Tibar [kategoria d)], hodi haforsa ligasaun entre formasaun téknika, padraun kompeténsia, instituisaun formasaun, peritu, empregadór no parseiru internasionál sira, Aleinde kompetisaun sira, programa sei inklui mós eventu paralelu balu, hanesan enkontru bilaterál, sorumutu estratéjiku ba kooperasaun, ezibisaun institusionál no empresariál, konferénsia téknika, workshop temátiku, no mós vizita edukasionál, institusionál no kulturál.
“Atividade sira-ne’e iha objetivu atu promove interkámbiu esperiénsia entre Timor-Leste, nasaun Pasífiku sira, nasaun ASEAN sira, WorldSkills Asia, parseiru dezenvolvimentu, sentru formasaun profisionál, empreza no reprezentante husi setór privadu” dehan Diretora Isabel.
Diretora Executivu INDMO konklui, Objetivu prinsipál husi eventu ida-ne’e mak, promove eselénsia iha formasaun téknika no profisionál, valoriza kompeténsia juventude no traballadór timoroan sira, aproxima sentru formasaun profisionál sira ba nesesidade reál merkadu traballu, haforsa kooperasaun rejionál ho nasaun Pasífiku no ASEAN, promove enkontru bilaterál no parseira estratéjika entre instituisaun, empreza no sentru formasaun sira, haforsa diálogu kona-ba rekoñesimentu kualifikasaun, sertifikasaun no mobilidade laborál, prepara Timor-Leste atu partisipa ativamente liután iha plataforma internasionál sira, inklui WorldSkills Asia, enkoraja inovasaun, dixiplina, profesionalizmu no kualidade iha sistema nasionál kompeténsia no promove oportunidade aprendizajen, interkámbiu tékniku no rekoñesimentu internasionál.
