Reportajen Silvino Freitas
Timor-Leste enfrenta preokupasaun foun kona-ba posibilidade nasaun ne’e uza hanesan fatin operasaun rede online scam no jogu ilegal, hafoin Polísia Nasional Timor-Leste (PNTL), liuhusi Diresaun Servisu Investigasaun Kriminal (DSIK) no Diresaun Servisu Informasaun Polísia (DSIP), ohin realiza operasaun ida iha Kampu Baru, Munisípiu Díli, no Ulmera, Munisípiu Likisá, ne’ebé rezulta iha detensaun ba sidadaun estranjeiru hamutuk nain 94 tanba alegasaun envolve atividade online scam no jogu ilegal.
Iha Komunikadu ne’ebé Neon Metin sita iha Pagina ofisial PNTL katak, Porta-voz PNTL no Diretór Atual DSIK, Superintendente Xefe Polísia João Belo dos Reis, hatete katak operasaun ne’e hala’o hafoin autoridade seguransa simu no rekolla informasaun liuhusi servisu hamutuk ho lideransa komunitária. Informasaun ne’ebé rekolla permite PNTL identifika fatin rua ne’ebé suspeita uza hanesan sentru ba atividade online ilegal.
Ekipa operasaun fahe ba grupu rua atu halo intervensaun simultaneamente iha Kampu Baru no Ulmera. Iha Kampu Baru, autoridade detein sidadaun Xineza nain 14 bainhira hala’o atividade call centre no jogu online.
Enkuantu iha Ulmera, autoridade detein sidadaun Indonézia nain 76 no sidadaun Xineza ida. Durante operasaun ne’e, PNTL mós apreende ekipamentu eletróniku no sasán seluk ne’ebé suspeita uza ba atividade refere atu serve hanesan evidénsia iha prosesu investigasaun.
“Bainhira ami rekolla informasaun hotu iha fatin rua ne’e, ami lansa kedas ekipa rua hodi halo operasaun iha Kampu Baru no Ulmera, besik Eskola Kasait. Iha Kampu Baru, ami detein sidadaun Xineza nain 14 ho flagrante delitu bainhira halo atividade call centre ka jogu online. Iha Ulmera, ami detein sidadaun Indonézia nain 76 no sidadaun Xineza nain ida. Hafoin halo identifikasaun, ami apreensaun ba sira nia ekipamentu no sasán sira hodi asegura no submete ba prosesu legal tuir mai,” dehan Superintendente Xefe Polísia João Belo dos Reis iha komunikadu ne’ebe Neon Metin asesu ohin husi iha pagina ofisial PNTL ohin Segunda 13/07.
PNTL esplika katak evidénsia sira ne’ebé apreende sei analiza no verifika ho klean, inklui dokumentu no rejistu sira atu determina natureza atividade ne’ebé hala’o no identifika ema hotu ne’ebé iha ligasaun ho kazu ida ne’e.
Porta-voz PNTL acrescenta katak to’o agora prosesu identifikasaun no verifikasaun ba sidadaun sira nia identidade no nasaun orijin sei lao hela. Nune’e, autoridade seidauk fó informasaun kompleta ba públiku tanba investigasaun sei kontinua.
PNTL garante katak kazu ne’e sei trata tuir lei vigente iha Timor-Leste, no promete sei fó atualizasaun oficial bainhira prosesu identifikasaun no investigasaun remata ona.
“Agora dadaun, ami nia ekipa DSIK sei halo verifikasaun ba sasán evidénsia hotu ne’ebé utiliza iha atividade jogu online ne’e no sei konfirma mós sidadaun sira nia nasaun. Bainhira prosesu identifikasaun remata ona, ami sei fó informasaun kompleta ba públiku atu akompaña dezenvolvimentu kazu ida ne’e,” nia konklui.
