Reportazen Santina Lucia da Costa
“Labarik sira Balun halo tanba forsa, obriga no hakarak, maibe lolos ne’e labele, sira tempu ba aprende ne’e aprende, ba eskola ne’e para sira iha kapasidade, aban bainrua hetan serbisu di’ak, maibe realidade mak hanesan ne’e, rai moris iha situasaun indezenvolvimentu, seidauk dezenvolvimentu to’o iha ema hotu, entaun grupus balun ne’ebe tenki sobrevive buka moris.” SEJD
Relasiona ho kazu traballador infantil ne’ebe kontinua iha numeru boot, hodi sustenta moris ekonomia uma laran ka tulun inan-aman nian todan, liu hosi editor club discussion ne’ebe organiza hosi Asosiasaun Jornalista Timor Lorosa’e (AJTL) ho topiku buka solusaun ba numeru dezempregu juventude ne’ebe aas durante period propagasaun COVID-19.
Kazu infantil ne’ebe tenke faan sasan ka kria serbisu ba nia an hodi hetan osan, jornalista Neon Metin dadalia ho Sekretariu Estadu Juventude Desportu (SEJD), Abrao Saldanha ne’ebe konaba asumtu refere.
Ba Neon Metin Sekretariu Estadu hateten labarik sira faan sasan lao iha dalan ninin, ne’e ita bolu trabalho infantil, tuir lei ne’e krimi, maibe realidade mak nune’e ita nia sosiedade sobrevivensia laiha meius atu moris, entaun iha esforsu sobrevivensia, ida ne’e mak karakteristika país sira hanesan ita nian, país indezenvolvimentu ita nian, realidade ne’ebe mak ita iha, ne’e forma sobrevivensia oinsa moris.
Abrao dehan tan hare hosi parte diretus umanus ne’e krime, maibe direitu prezerpsi ita debate ida ne’e, direitu vida, se estadu lakonsege, laiha kondisoens atu buka moris, ema halo atividade sobrevive ne’e mos direitu vida, previnsaun trabalho infantil ne’e mos direitu ida.
“Labarik sira Balun halo tanba forsa, obriga no hakarak, maibe lolos ne’e labele, sira tempu ba aprende ne’e aprende, ba eskola ne’e para sira iha kapasidade, aban bainrua hetan serbisu di’ak, maibe realidade mak hanesan ne’e, rai moris iha situasaun indezenvolvimentu, seidauk dezenvolvimentu to’o iha ema hotu, entaun grupus balun ne’ebe tenki sobrevive buka moris.” hateten SEJD, Abrão Saldanha ba Neon Metin, iha Salaun Konsellu Imprensa, Quintal-Boot, loron, 23/09.
Sekretariu Estadu dehan politika ba haree ida ne’e mak, SEJD bele koalia ho governu oinsa bele kria politika integral, tanba saida mak SEJD agora halo dadauk ne’e, oinsa mak iha abordajen integradu iha nivel politika governu hotu-hotu laos SEJD de’it, oinsa maka kazu ida ne’e bele rezolve, oinsa komisaun labarik bele tau matan ida ne’e.
Nia haktuir SEJD nia serbisu agora, oinsa mak halo politika asaun nasional para bele responde ba kestaun sira ne’e.
Abrão konfesa ba inan-aman sira ne’ebe komprende situasaun ida ne’e, familia balun labele duni, situasaun sira hanesan ne’e, liuliu fo atensaun ba labarik sira, investe sira ba edukasaun, haruka sira ba eskola iha tempu ne’ebe sira tenke estuda, para sira bele prepara sira nia futuru di’ak.
Editor Club Discussion ne’ebe realiza, AJTL serbisu hamutuk ho Konsellu Imprensa no TVE-T no hetan apoiu fundus hosi UNDP no governu Korea liu hosi agensia KOICA
