Reportazen Zevonia Vieira
Asosiasaun Jornalista Timor Lorosa’e (AJTL) serbisu hamutuk ho Oxfam realiza Media Tour ne’ebe foka liu konaba promove agrikutura, liu hosi alokasaun Orsamentu Jeral Estadu (OJE) 2021.
Liu hosi konferensia imprensa Inclusive Development Program Manager Oxfam, Lucio Savio ba jornalista sira hateten atividade Media Tour ne’e, sei halo kobertura ba atividade agrikultura komunidade nian, iha area rural ne’ebé durante ne’e balun sidauk hetan atensaun husi mak kaer ukun sira. Maski agrikultura maka setór ne’ebé importante tebes no maioria povu Timor-Leste maka depende sira nia moris ba setór agrikultura.
Nia dehan reflete ba dadus sensu 2015 hatudu katak 89.8% família mak moris depende ba agrikultura, hodi sustenta moris loron-loron nian no tuir planu rekuperasaun ekonomia konsidera setór agrikultura nu’udar setór importante no prioridade atu investe ho seriedade, hodi asegura soberania ai han ba komunidade.
Pandemia COVID 19 lori reflesaun katak presiza duni investe iha setór agrikultura hodi nune’e bele fó ai han natoon ba komunidade sira, tanba Pandemia COVID-19 sidauk iha serteza atu lakon. Nasaun sira hanesan Timor-Leste ne’ebé depende makas ba importasaun husi rai li’ur, liu-liu nesesidade báziku sira sei hetan ameasa no laiha serteza ba nesesidade ai han ne’ebé sufisiente.
Nia mos hateten governu submete ona proposta orsamentu 2021 nian ba Parlamentu Nasionál no tuir kalendáriu konsultasuan públiku no diskusaun iha plenáriu sei hahú iha fulan Novembru 2021. Iha dékada ikus ne’e alokasaun orsamentu ba setór agrikultura maka la to 3 % ka menus husi porsentu 3%, maski iha plataforma polítika governu nian maka define agrikultura nu’udar setór importante.
“Mezmu tempu ho OGE 2021 ne’ebé la kleur sei iha konsultasuan no debate iha plenária, AJTL no Oxfam hakarak halo kobertura komunidade sira nia atividade iha setór agrikultura no aprezenta situasaun real sira ne’ebé komunidade sira enfrenta iha area rural, ida ne’e nu’udar evidénsia ida ne’ebé bele aprezenta ba mak kaer ukun sira no públiku katak, presiza iha ona seriedade no planu ne’ebé di’ak no iha konsisténsia ba investe iha setór agrikultura liu husi Orsamentu Jerál Estadu 2021 nian”, hateten Lucio Savio
Iha fatin hanesan Koordenador Media Tour AJTL, Floriano Soares hateten AJTL iha inisiativa boot hodi halo programa Media Tour ne’e, lori nia membru AJTL sira ba area rural, hodi buka hatene situasaun ne’ebe komunidade sira iha kraik hasoru, liu-liu konaba situasuan agrikultor sira oinsa sira nia produtu ne’e asesu merkadu, oinsa governu bele fo atensaun makaas no investe makaas iha seitor agrikultura.
“AJTL iha komitmentu boot hodi lori nia membru sira ba area rural, hodi hatoo komunidade sira nia lian ema la rona, liu-liu ukun nain sira. Dalabarak jornalista halo kobertura deit iha sidade no foti lian hosi ukun nain sira no ema kiik sira la iha spasu hodi hatoo sira nia lian”, tenik Floriano Soares, iha edifisu Oxfam, 27/10.
Nia hatutan AJTL sei kontinua halao atividade ne’e, lori nia membru sira ba iha area rural sira hodi kontinua buka hatene situasaun agrikultor sira ne’ebe mak sei hasoru difikuldade barak, relasiona ho sira nia produtu ne’ebe laiha folin no oinsa ida ne’e bele sai diskusaun publiku no governu bele buka solusaun hodi responde preokupasaun sira ne’e.
AJTL agradese tebes ba Oxfam ne’ebe apoiu tebes AJTL nia programa, hodi luta ba direitus umanus no fo spasu ba ema kbiit laek sira, liu-liu agrikultor sira hatoo sira nia lian.
Media Tour ne’e hala’o iha Muncipiu Aileu no Ermera, ne’ebe hahu hosi loron 27-29 Outubro 2020.
