Home Notisia Fundasaun Cultural Le-Ziaval Fo Formasaun, “Juventude, Lideransa ba Futuru”

Fundasaun Cultural Le-Ziaval Fo Formasaun, “Juventude, Lideransa ba Futuru”

61
0

Reportajen Adroaldo ‘Saretuka’

Fundasaun Cultural Le-Ziaval orgniza formasaun ba joven sira kona ba liderança, interpesonal skills, hakerek, CV, interview no dezenvolvimentu pessoal.

Ministru Reforma Lejislativa no Asuntu Parlementar, Fidelis Magalhães nudar orador ba formasaun ne’e hatete katak importante tebes ba jovens sira atu iha kapasidade liderança no interpersonal skill.

“Lideransa no interpersonal skills importante tebes papel iha organizasaun ida, skills ne’ebé ita aprende sei importante tebes ba ita nia vida tomak, sa tan ita moris iha sosiedade demokrátika hanesan Timor-Leste. lideransa ne’e ema ida nia kapasidade atu halo grupu ida, atu hetan vontade kolektiva ida. Só lideransa na prátika ne’e mistura, iha elementu balu ke natureza mak fó ba ema balun, maibé iha lideransa balun tenki mistura ho aprende skills interpersonal para nia bele sai ema ida ne’ebé konvense ema seluk atu bele hetan desizaun kolektiva ida”, Fidelis hateten.

Fidelis mos aumenta tan dehan, “Interpersonals skills ne’e save ba lideransa. Lider la iha interpersonals skill la sai lider. Interpesonals skills mós xave ba ita nia moris iha sosiedade tomak. Sá tan, importante liu iha sosiedade demokrátika, ke ita labele kaer kilat obriga ema atu tuir ita. Ita tenki lidera nia, konvense nia, konvense nia ho ita nia matenek, konvense nia ho ita nia ko’alia, manan mós nia ho ita nia skills negosiasaun.” Lia hirak ne’e Ministru Fidelis koalia ba participantes sira horiseik, 9/02, iha Leitura Xanana Gusmão.

Formador no membro sénior Fundasaun Le-Ziaval, Zofimo Hanzam Corbafo, hatete mos hatete katak, “Semináriu ida ne’e ami halo parte mós hosi programa formasaun ne’ebé foka liu ba iha oinsá atu denvolve abilidade ka soft Skill. Formasaun ne’ebé ami halo ona, inklui oinsá atu prepara joven sira liu-liu ita nia estudante sira ba iha kampu de traballu, liu-liu ligadu ba abilidade interpersonalia ni-nian.”

Nia hatutan dehan formasaun sira ami halo mak hanesan dezenvolve CV, prepara ba intervista, introdusaun ba personalia iha servisu fatin, lideransa nomós hanoin pozitivu. Entaun, semináriu ida ohin ne’e hanesan konklui ba iha ami nia programa formasaun ni-nian, au mezmu tempu ami atribui sertifikadu ba sira ne’ebé mak kompleta ona ho susesu.

Partisipante formasaun, Abílio Correia Lopes expressa nia haksolok ho treiamentu mak halo.

“Iha treinamentu ne’e hau bele aprende matéria sira ne’ebé relevante ba iha ita nia dezenvolvimentu pesoal, atu oinsá ita bele prepara ita nia aan ba futuru. Matéria ne’ebé ami hetan mak ne’e, oinsá hakerek ita nia CV ho profiional, oinsá tuir interview, wainhira ita tuir vaga ruma, oinsá iha pensamentu krítiku ba kazu ruma. Matéria hirak ne’e importante liu hotu, ba ita hotu, ba estudante ne’ebé prepara nia aan atu bele hetan servisu iha fatin ruma iha futuru”, Abilio expressa.

Partisipante seluk, Mariana Octavia hatete, mos dehan katak, “Ha’u nu’udar estudante soft-skill ni-nian, ha’u sente orgullu teb-tebes, tanba ami hala’o treinamentu durante fulan neen nia laran konabá soft-skill no ohin loron ne’e ami taka ho semináriu. Ba semináriu loron ohin, ha’u senti valor tebes mai ami juventude sira, tanba iha semináriu ida ne’e iha orador ne’ebé mak prinsipal sira fó sira nia aprezentasaun konabá juventude futuru sira nian. Tanba ne’e liu hosi semináriu ida ne’e, ami bele hatene ami nia aan nu’udar juventude.”

Treinamnetu ne’e organiza hosi Fundasaun Cultural Le-Ziaval. Fundasaun ne’e nudar fundasaun non-profit, fundasaun ida ne’e iha mahon Sala Leitura Xanana Gusmão. Fundasaun ne’e hetan fundus ruma ba hala’o programa ida ne’e, maibé ami la’o ho voluntáriu hosi membru Fundasaun Le-Ziaval nian rasik. Iha eventu ida ne’e ami ho ami nia kontribuisaun finanseira rasik nomós apoiu kompañia balun hanesan Sylvia Díli ne’ebé mak ajuda iha material balu, ami hodi halo semináriu ida ne’e.

LEAVE A REPLY

Please enter your comment!
Please enter your name here