Home Notisia RENETIL ho Delegasaun Bangsamoro Hasoru Malu

RENETIL ho Delegasaun Bangsamoro Hasoru Malu

334
0
Reprezentante RENETIL hasoru malu ho delegasaun Bangsamoro (Foto: Gaudencio Sousa)

RENETIL hasoru malu ho delegasaun hosi Bangsamoro hodi fahe experiensia ba malu kona ba evolusaun resolusaun konflitu mak akontese iha Bangsamoro no mos iha Timor-Leste. Sekretariu Jeral RENETIL, Joaquim ‘Russuo’ Fonseca, fahe ho delegadu sira RENETIL nia luta iha tempu rezistensia no oinsa RENETIL kontinua luta hodi kontribui ba governasaun estadu iha tempu Timor-Leste ukun rasik an.

“RENETIL nia luta ba libertasaun patria no povo. Tanba ne’e, la hanesan ho organizasaun sira seluk, liu hosi kongresu RENETIL nian, halao iha tempu inisiu tinan 2000, redefine papel RENETIL nian hodi kontinua luta ba libertasaun povo. Iha kontinuasaun luta ba libertasaun povo nian, membru RENETIL kontribui liu hosi fatin oioin, hosi RENETIL rasik, hosi organizasaun naun-governamental sira mak membru sira lidera, no mos hosi partidu politik mak membru sira hola parte ba,” Russuo esplika ba delegasaun sira iha han kalan hamutuk, 12/12, iha Bebonuk, Dili.

Russuo mos konta tuir kona ba membru RENETIL sira mak kaer pasta importante iha estadu nian.

Reprezentante hosi Bangsamoro nian fahe experiesnia kona ba tranzisaun mak akontese hela dadaun iha Bangsamoro.

“Ami hakat hela iha prosesu tranzisaun nia laran. Ami komesa iha partidu politik no mos organizasaun sosiedade civil sira mak partisipa iha prosesu tranzisaun. Ami iha Timor-Leste hodi aprende oinsa Timor-Leste hakat liu prosesu sira no aprende kona ba dezenvolvimentu ne’ebe lao dadaun, “ Membru Parlamentu Bangsamoro nian ne’e hatete.

Bangsamoro nia naran ofisial mak Bangsamoro Autonomous Region in Muslim Mindanao (BARMM). Rejiaun Autonomo ne’e establese bainhira votante sira desidi atu ratifika Lei Organiku Bangsamoro nian iha 21 Janeiru 2019. Lokaliza iha Norte Cotabato, Mindanao, Filipina.

Konflitu mak akontese entre Bangsamoro nia forsa armada sira, Moro National Liberation Front, hafoin fahe malu mos ba Moro Islamic Liberation Front lao tinan barak nia laran. Literature balun refere ba konflitu Bangsamoro nian tinan 50 resin. Sira foin asina Paktu Dame nian ho governu sentral Filipina iha 2014. Oras ne’e dadaun Bangsamoro iha tranzisaun nia laran. Sira autoridade tranzisaun nian naran mak Bangsamoro Transition Authority (BTA).

Vizita Delegasaun Bangsamoro ne’e kompostu husi Membru Parlamentu, Reprezentante Sosiedade Sivíl no Reprezentante Autoridade Tranzitóriu Bangsamoro ne’e fasilita husi Centro Nacional Chega! no g7+.

Durante iha Timor-Leste, Delegasaun ne’e sei halo vizita ba Parlamentu Nasional, halo audiénsia ho Primeiru-Ministru, hasoru malu ho Reprezentante Partidu Politiku sira no halo vizita ba Munisípiu Liquiça.

LEAVE A REPLY

Please enter your comment!
Please enter your name here