Home Notisia Serbisu Imigrasaun Tinan 2019, Hatama Reseitas Ba Kaixa Estadu Total $3.097.085.00

Serbisu Imigrasaun Tinan 2019, Hatama Reseitas Ba Kaixa Estadu Total $3.097.085.00

252
0
Diretór Jeral Servisu Imigrasaun Superintendente Polisia, Agustinho da Silva Gomes hamutuk ho ekipa halo konferensia imprensa. [Foto: 15.01.2020]

Reportazen Santina Lucia da Costa

Parte Servisu Imigrasaun Timor-Leste aprezenta relatoriu atividade liga ho vizitantes tama no sai liu hosi fronteira no aero porto Prezidente Nicolau Lobato.

Liu hosi konferensia imprensa, Diretór Jeral Servisu Imigrasaun Superintendente Polisia, Agustinho da Silva Gomes hateten serbisu imigrasaun Ministeriu Interior Timor-Leste, publika sai atendimentu 2019 ba publiku, relasiona ho presepsaun publiku ba serbisu imigrasaun durante ne’e sempre negativu.

“Movimentu entrada iha tinan 2019 hosi serbisu imigrasaun, atende ema ne’ebé maka tama sai teritoriu nasional Timor-Leste, liu hosi fronteira, vizitante ne’ebe tama mai Timor hamutuk 223.628, portantu ne’ebé mak sai husi Timor-Leste ba rai liru total 222.559, liu hosi aeroportu internasional Prezidente Nicolau Lobato Comoro”, informa Diretor Jeral Agustinho, 15/01.

Diretor hatutan iha postu fronteira Mota-Ain, Salele, Sakato no Oesilo Oe-cusse mos nudar fatin ba movimentu hosi visitantes sira hosi rai liur no rai laran.

Diretór Jeral Servisu Imigrasaun esplika mos katak, kona-ba sidadaun estranjeiru ne’ebé maka halo prolonggasaun vistu iha tinan ida nia laran, hodi kontinua permanensia iha teritoria laran tomak, husi ema hirak ne’ebé mak tama iha ema 9.869, vistu ne’ebé hetan ne’e kompostu husi vistu turista no vistu trabalho estadu espesial ne’ebé mak temi iha leten.

Aliende ida ne’e, iha mós autórizasaun rezidensia ne’ebé maka fó ba sidadaun estranjeiru ne’ebé mak hela iha Timor-Leste hamutuk ema 296 , ne’ebé mak hetan autorizasaun rezidensia, ida ne’e serbisu ne’ebé hala’o iha rai laran.

Konaba estranjeiru adidu imigrasaun sira ne’ebé maka koloka iha embaixada no konsuladu iha estranjeiru sira, publika katak vistu trabalho hamutuk ema 2269, hanesan ba vistu trabalho ne’ebé maka adidu imigrasaun, ne’ebé mak koloka iha Kupang, Bali, Singapura no rai seluktan.

Diretor Agustinho mos informa konaba vistu trabalho sira, ba fiksasaun rezidensia hamutuk ema 326, ba vistu edukasaun ba sidadaun estranjeiru ne’ebé mak mai estuda iha Timor-Leste hamutuk ema 47.

Informasaun seluk ne’ebe parte imigrasaun, tanba identifika no kosege rejista, hodi prosesu ba sidadaun estranjeiru ne’ebe maka tama teritoriu nasional Timor-Leste ilegalment hamutuk ema 13, sedauk inklui nain sia, ne’ebe mak iha hela prosesu nia laran.

Parte Imigrasaun aplika Lei Imigrasaun artigu 144, katak ba kompania ne’ebe mak fo serbisu ba sidadaun estranjeiru ho vistu turismu hodi hala’o servisu, sira hetan multa $46.500 dolar Amerikanu.

Imigrasaun Timor mos aplika ba ema estranjeiru sala uza vistu turismu, hodi halao serbisu ho atividade profesionais iha teritoriu tomak, iha tinan 2019 ho multas mak hetan $91.600 dollar Amerikanu. Ba ema estranjeiru neebe kontra Lei Imigrasaun artigu 147 ho multas $1.430 dollar Amerikanu. Ba kompania no pesoal ne’ebe mak kontra Lei Imigrasaun iha asumtu seluk total $139.520 dollar Amerikanu.

“Ho serbisu imigrasaun hala’o iha tinan 2019, husi aktividade hotu ne’ebé maka hala’o mak konsege hatama reseitas ba kaixa estadu ho montante $ 3.097.085.00”, dehan Superintendente Polisia Agustinho da Silva Gomes.

LEAVE A REPLY

Please enter your comment!
Please enter your name here