Home Feature EE, Bengkel Ausay Rendimentu Tun, Joanico: Hau Hapara Trabalhador Sira Tanba Laiha...

EE, Bengkel Ausay Rendimentu Tun, Joanico: Hau Hapara Trabalhador Sira Tanba Laiha Osan

931
0
Nain ba Bengkel Office Asukau, Joanico da Costa. [Foto: Santina Lucia da Costa | 20.04.2020]

Reportazen Santina Lucia da Costa

Moras surtu virus Corona sai inimigu boot vida ema nian, ema hotu preokupa virus ne’e loron ida sei daet bai sin lolon. Corona laoa ameasa deit ema nia vida saude, maibe ameasa ema ida nia vida ekonomia, tanbasa? Tanba estadu tenke foti desizaun implementa Estadu Emerjensia [EE], hodi limita movimentu iha fatin publiku, ho razaun atu virus ne’e la daet ba ema ho ema.

Saida mak akontese bainhira moris iha situasaun estadu emerjensia? Oinsa ema kbiit laek sira ne’ebe halo negosiu kiik, hodi bele sustenta sira nia moris?

Neon Metin kontinua buka dalan, hodi hasoru maluk sira ne’ebe laiha ona kbiit tanba impaktu hosi estadu emerjensia. Joanico da Costa, ne’ebe harii benkel ho narasaun Office Ausay, hasoru duni susar tanba bengkel ne’ebe nia loke labele hetan rendimentu.

“Ami nia preokupasaun iha liu ami nia nesesidade loron ba loron nian, ami nia roda ekonomia sempre tun, ami kestiona ba estadu, bainhira prolonga tan estadu emerjensia ida ne’e, espera ami povu labele sai vitima fali ba estadu emerjensia ne’e”, tenik Joanico ho esperansa boot.

Joanico hateten pronto kontribui tuir ba regras ne’ebe mak iha katak tenke fase liman bebeik ho sabaun, halo distansia social metro 1, maibe tenke lakon saida mak loloos ne’e sai hanesn ami nian direitu atu asesu serbisu. Oinsa ho vida kondutor ba transporte publiku, sira tenke lakon serbisu no labele hetan osan, susar ba sira atu hatutan moris ba loron-loron nian.

“Estadu emerjensia ida ne’e ninia implikasaun liu ba ami povu ki’ik, ita bele dehan funsionariu auto-kuarentena iha uma, maibe sira garantia sira nia osan kada fulan osan tama iha sira nia konta bankaria, maibe ninia impaktu ba ami povu atividade negosiu ne’ebe laiha sirkulasaun ekonomia. Ami bele mantein ami nia pozisaun hodi kontribui ba estadu emerjensia, maibe estadu mos iha dever hodi toma responsabilidade ba povu ne’ebe infrenta problema moris nian.

“Hanesan mos agora dadaun iha hau nia ofisina, mantein distansia sosial, hodi kontribui ba estadu emerjensia ida ne’e, maibe nia impaktu ba ami, ba hau nia trabalhador ne’ebe serbisu ami hapara hotu tanba kumpri regras estadu emerjensia, mantein nafatin iha uma hodi prevene moras Covid 19”,  tenik Joanico ba Neon Metin 19/04, iha Tasi Tolu.

Joanico hateten estadu labele haree liu ba kompanhia internasional sira,  maibe haree mos kompanhia nasional no loka sira, tanba kompanhia nasional no lokal mos kontribuisaun ba estadu, bele minimiza mos empregu no aumenta kampu trabalho.

Trabalhador ne’ebe serbisu iha bengkel Office Ausay total nain 15, permanente nain 7 no kontratadu kada kareta nain 8. Sira ne’ebe mak serbisu hanesan ema tekniku kada fualn simu salario $200.00 ba leten, ba ajudantes hetan $120.00 kada fulan.

Bainhira estadu emerjensia implementa Joanico labele fo salario ba fungsionariu sira, tanba laos hanesan kompania boot, maibe nia esforsu an hodi ajuda ba sira nia nesesidade loron-loron nian deit.

“Trabaldor sira lahetan salariu durante iha estadu emerjensia, tanba wainhira serbisu mak iha benefisiu ba ofisina, maibe wainhira laiha serbisu ita bele dehan orsamentu iha ofisina laiha sirkulasaun, tan ne’e sira labele hetan salariu”, konfesa Joanico.

Bengke Office Ausay harii iha tinan 2014 to’o ohin loron, relasiona ho virus Corona no Estadu Emerjensia fo impaktu tebes ba bengkel refere.

LEAVE A REPLY

Please enter your comment!
Please enter your name here