Home Meio Ambiente Etelvina Ho Virginia Cleaner Iha Merkadu Taibesi, Fulan 6 Ona La Simu...

Etelvina Ho Virginia Cleaner Iha Merkadu Taibesi, Fulan 6 Ona La Simu Salariu

335
0
Etelvina Ho Virginia Halo Knaar Nudar Cleaner Iha Merkadu Taibes, Fulan 6 Ona La Simu Salariu. [Foto; Francisco JDA | 09.07.2020]

Reportazen Francisco JDA

Bainhira ema soe lixu arbiru, nia iis no nia dodok sei estraga ema nia saude, sa tan bainhira udan monu rai, bele provoka lalar no susuk hodi hobur, no sei fo moras ba ema nia saude.

Ema ne’ebe halo serbisu hanesan cleaner, nia mos heroi ida, maske nia salario kiik maibe nia salva ona ema dook hosi moras, dook hosi dois no halo rai sai furak tanba laiha foer, maibe ida ne’e la akontese ba feto maluk ne’ebe halao knaar hanesan cleaner, Etelvina Fatima Conseicao.

Heroina ne’ebe hadomi ambiental, la hetan nia direitu ne’ebe justu. Etelvina lor-loron halo nia knaar iha merkadu Taibesi, hodi hamoos lixu sira ne’ebe dalabarak ema soe arbiru, sira la preokupa no laiha konsiensia, maibe ho pasensia Etelvina haktuir nia funsaun, hodi kontinua dasa foer sira ne’e.

Jornalista Neon Metin dada lia ho cleaner Etelvina konaba nia serbisu ne’ebe nia halao iha merkadu Taibesi maibe hahu hosi fulan Janeiru to’o ohin loron nia la simu salario

“Direitu ami nian ne’e mak ami la hatene loos, ami ba ida ne’e, dudu ami ba ida ne’e, ami nia kontratu no salariu ne’e ami la hatene loos, maibé servisu iha terminal laran ne’e, ami hala’o hela too agora, ami la hatene atu asina kontratu ne’e oinsá los, durante tempu Covid-19 nian mós ami la husik servisu ne’e, ami sente triste tanba ami servisu loron loron maibé la iha salariu to’o agora”, tenik cleaner, Etelvina Fatima Conseicao, iha Taibesi 08/07

Maske servisu ne’ebé halo la iha Salariu to’o agora, heroina ne’e hateten, kontinua dasa no hili lixu sira nee. Etelvina hateten dalaruma ema ne’ebé la komprende soe foer arbiru, maibé nafatin pasensia, hodi hamoos tanba nudar dever ida tenki halo

Heroina ba Ambiental ne’e husu ba nain ulun sira, atu atende hela salario ne’ebe to’o ohin loron sira la simu.

Iha fatin hanesan, Virginia da Conseicao Rodrigues reforsa tan, hahu hosi 2014 – 2019 salariu la’o di’ak, maske iha falansu  oituan no salariu ne’e selu hosi Ministeriu Turismu Comersiu  Industria ( MTCI), maibé to’o agora se mak atu hala’o kontratu ne’e la hatene, maske Admistrasaun Municipiu Dili hatete katak hein de’it bainhira iha kontratu.

“Hosi 2014 too 2016 ne’e MTCI mak selu, hosi 2017 entrega ba Municipiu mak tau matan mai ami, maibé hosi Admistrasaun Municipiu Dili ne’e hateten, servisu de’it hodi hein kontratu,iha bairo ne’e ami servisu la’o nafatin, ami tenki ezije ami nia direitu, ba sira ne’ebé tau matan ba ami, maske sente triste, maibé ami kontinua hala’o nafatin ami nia servisu”,  hateten Virginia da Conseicao Rodrigues.

Nia hatutan tan, katak durante ne’e ema ne’ebé servisu nudar cleaner, hodi hamoos, hadia fatin no dasa rai hamutuk feto nain 8 no mane 12. Bainhira Neon Metin hasae nutisia ne’e sedauk halo konfirmasaun ho Administrasaun Municipiu.

LEAVE A REPLY

Please enter your comment!
Please enter your name here