Home Notisia PR Dekreta EE Da-Haat, Sei Suspende Liu Konaba Sirkulasaun Internasional

PR Dekreta EE Da-Haat, Sei Suspende Liu Konaba Sirkulasaun Internasional

222
0
Prezidente Republika, Dr. Francisco Guterres Lu Olo. [Foto: Santina Lucia da Costa | 06.08.2020]

Reportazen Santina Lucia da Costa

Prezidente Republika, Dr.Francisco Guterres Lu-Olo deklara Estadu Emerjensia  (EE) ba da-haat, ne’ebe hahu husi loron 6 Agostu iha oras 00:00 no sei remata iha tuku 23.59 loron 4 Septembru 2020.

Liu hosi deskursu ofisial Prezidente Repúblika hateten katak, Prezidente simu pedidu husi governu iha loron 4 Agostu 2020, iha loron nee duni, kazu foun Covid-19 deteta iha sidadaun ida ne’ebé tama-mai Timor-Leste, iha loron 22 Jullu husi fronteira-rai.

Sidadaun ne’e haketak kedas iha fatin-izolamentu Vera Cruz no Ministériu Saúde hatutan kedas kuarentena ba sidadaun sira tama-mai iha Timor-Leste, iha loron hanesan ho sidadaun kazu pozitivu nee no medida seluk foti mós, atu la husik moras nee  hadaet ba komunidade.

Prezidente Lu Olo hateten hafoin hetan apoiu husi Konsellu Superior ,Defeza no Seguransa no Konsellu Estadu, no hafoin simu autorizasaun husi Komisaun Permanente Parlamentu Nasional, Prezidente Repúblika ho kbiit Konstitusional deklara estadu emerjénsia liuhusi dekretu prezidensial neebé  publika  iha Jornal Repúblika iha loron 5 Agostu 2020.

Lu-Olo deklara ho estadu emerjénsia medida sira ne’ebé ita hotu tenke hatuir, husi sorin ida, permite fó protesaun ba saúde públika, maibé husi sorin seluk, suspende ka limita direitu no liberdade prinsipal sidadaun sira-nian, ne’ebé Konstituisaun fó.

“Enkuantu ita tuir dadaun medidas estadu emerjénsia, tanba pandemia Covid-19, órgaun soberania sei  buka-hetan dalan legal seluk, atu fó protesaun nafatin ba ita-nia povu.  Hau fiar katak órgaun soberania sira sei hetan solusaun legal seluk ida, iha tempu badak”, hateten, Lu-Olo.

Lu-Olo akresenta situasaun ohin loron iha ita-nia rai-laran,  la ezije atu foti medidas makaas. Ita sei foti deit medidas hanesan períodu estadu emerjénsia datoluk. Durante períodu estadu emerjénsia ida ne’e, atividade ekonómika, sosiál, kulturál, eskolár, servisu, vizita família ka atividade seluk  lao hanesan baibain.

“Maibé ita labele haluha katak moras Covid-19, sei la husu lisensa atu tama iha ita-nia rain. Moras ne’e bele mosu iha momentu ne’ebé deit. Nunee importante tebes ita proteje-an nafatin no proteje ema hotu.  Ema ida-idak tenke hatuir nafatin medida tolu importante tebes mak hanesan fase liman beibeik, uza máskara no halo distansiamentu sosiál.  Bainhira halao atividade ruma ho ema rua ka liu, hotu-hotu tenke tau máskara no hadok-an malu metru ida, pelumenus”, informa Lu-Olo.

Xefe Estadu dehan estadu emerjénsia foun ida ne’e, sei suspende no limita direitu no liberdade balun kona-ba sirkulasaun internasionál, liberdade sirkulasaun no hili residénsia iha fatin neebé deit iha territóriu nasionál mós direitu ba rezisténsia, katak ema hotu tenke kumpre medidas hatún husi governu.

Kona-ba sirkulasaun internasional, Prezidente Repúblika husu ba autoridade relevante sira atu tau atensaun espesiál ba pontus entrada, katak fatin ema tama husi rai-li’ur hanesan fronteira-rai, aeroportu no fatin ró sira tama, atu ita la husik   koronavírus tama tan iha ita-nia rain.

Ho estadu emerjénsia ida nee, timoroan ka sidadaun estranjeiru ne’ebé iha autorizasaun atu tama iha Timor-Leste, tenke submete hotu ba izolamentu obrigatóriu, katak sei  moris ketak  iha fatin  ida,  durante loron 14. Haketak iha fatin kuarentena ka fatin aprova husi Ministeriu Saúde, karik hetan kazu pozitivu, sidadaun afetadu tenke tama iha fatin-tratamentu determina ona husi Governu.

Prezidente Repúblika husu ba povu tomak atu ajuda governu implementa estadu emerjénsia. Husu  ba populasaun hela iha fronteira no iha tasi-ibun atu matan moris  liután, hodi labele husik ema tama arbiru iha ita-nia rain, liuhusi dalan ilegal.

Prezidente Repúblika husu mos ba maluk hotu atu moris hakmatek no hatuir rekomendasaun husi Ministériu Saúde no Organizasaun Mundial Saúde (OMS) katak fase liman beibeik, uza máskara no distansiamentu sosiál.

LEAVE A REPLY

Please enter your comment!
Please enter your name here