Home Notisia Mouris: Ami Iha Obrigasaun Koalia Nafatin Ba Jovem Sira, Espiritu Uluk Labele...

Mouris: Ami Iha Obrigasaun Koalia Nafatin Ba Jovem Sira, Espiritu Uluk Labele Lakon

374
0
Prezidente Komite 12 Novembru, Gregorio Saldanha 'Mouris". [Foto: Francisco JDA | 10.11.2020]

Reportazen Francisco JDA

Relasiona ho loron nasional Juventude 12 Novembru, ne’ebe konnesidu ho Masakre 12 Novembru 1991, liu hosi seminariu ne’ebe organiza hosi Juventude Organizasaun Sagrada Familia (JOSF) ho tema “ Transmiti espíritu 12 Novembru ba Joven Sira iha Faze Libertasaun Povu”.

Reprezentante Primeiro Ministru no nudar Koordenadór Fundu Sosiedade Civil, Tito Filipe iha intervensaun hato’o lia menon hosi Primeiru Ministru katak ohin sei hare joven sira ne’ebe tur iha sala nakonu hanesan fali joven uluk organiza 12 Novembro ho espíritu ne’ebe hanesan ho joven ohin loron, iha tempu uluk nasaun Timor-Leste mak iha operasaun no abuzu iha direitus humanus nia okos no liberdade ba autodeterminasaun momentu ne’e iha impedimentu.

“Primeiru Ministru hakarak fo hanoin fila fali katak iha tempu ukun-an ita nia problema sei iha, moris kiak rabat rai no iha mal nutrisaun, inseguransa ai-han, iha problema kona ba kualidade edukasaun, prestasaun serbisu no problema seluk ne’ebe ita nia nasaun infrenta. Atu infrenta ida ne’e governu mesak labele halo, presiza hotu-hotu nia apoio”, hatete Reprezentante Primeiru Ministru Tito Filipe iha salaun Xanana Sport Centre, Bairo Grilhos, 10/11.

Tito Filipe hatutan Primeiru Ministru hamenu hela ba joven sira, atu hahú hanoin ho creativu, ideas, atu oinsá solusiona problema. Jovem ne’e forsa boot ba dezenvolvimentu, jovem okupa maiór parte hosi populasaun, entaun buka atu esforsu-an, governu kontinua apoiu saida deit mak governu bele, tuir rekursu ne’ebe iha atu bele tulun organizasaun no joven sira bele ativu liu tan.

Iha Fatin hanesan Prezidente Komite 12 Novembru no nudar orador, Gregorio Saldanha “Mouris” iha hateten joven uluk no joven agora diferente duni, tanba avansu teknolojia la hanesan, tanba ne’e mak halo transmisaun valor prinsípiu espiritu 12 Novembru ba jerasaun foun, tanba jerasaun agora ho influensia teknologia, mudansa siénsia no diferenti iha ambiente.

“Ami sira ne’e iha obrigasaun atu koalia nafatin ba jovem sira, atu nune’e espíritu sira ne’ebe uluk iha ne’e labele lakon, espíritu mak serbisu badinas, hare malu diak, unidade metin, hadomi malu no respeita malu.  Koalia ho étika buat sira ne’e mak valores, iha diferensa uluk, ita liberta rai ne’e, ohin atu priense fo han povu, ami halo nafatin dalaruma ami halo seidauk diak hotu, presiza hadia nafatin”, hatete Prezidente Komite 12 Novembro Gregorio Saldanha.

Orador sira ba seminariu refere mak Presidente Komite 12 Novembru, Gregorio Saldanha, Secretario Estadu Juventude Desportu (SEJD), Abrao Saldanha, Presidente CNJTL, Maria Dady Magno, Sobrevivente 12, Domingos Lambertu no Duarte Ximenes.

LEAVE A REPLY

Please enter your comment!
Please enter your name here