Home Analisa Indeminazasaun La Garante Komunidade nia Direitu Asesu Ba Rai no Uma

Indeminazasaun La Garante Komunidade nia Direitu Asesu Ba Rai no Uma

2637
0
Jemicarte Moniz dos Reis. Lic.AP. [Foto: Dokumentu privadu | 12.12.2020]

Hakerek nain Jemicarte Moniz dos Reis. Lic.AP

rai no uma mak hanesan problema sosial ida ne’ebé mak komplexu tebes no kontinua sai preukupasaun bo’ot iha Timor-Leste hahu husi kolonializasaun portugueza, durante okupasaun Indonezia to Timor-Leste hetan ukun rasik an. Impaktu husi despeju obrigatoriu ne’ebé halo ona bá komunidade sira ne’ebé mak okupa rai estadu no rai privadu mak muda husi sira nia hela fatin ba fatin seluk. Nune’e populasaun sira ne’ebé hela iha rai ka uma estadu inklui ema ne’ebé iha estatutu rai la klaru, sai potensia bo’ot atu hetan eviksaun iha futuru. Tuir observasaun husi Jurista Advokasia habadak ho Sigla (JA), hatudu katak iha komunidade balun maske simu ona kompensasaun finanseiru husi governu maibé osan sira ne’e la to’o atu bele sosa rai no hari uma foun sira, nune’e halo komunidade sira afetadu no sai vulneravel liu tan, tanba sofre mós ba sira nia direitu sira seluk hanesan moris iha kondisaun hela fatin ne’ebé la adekuadu iha tempu udan, la iha saneamentu adekuadu, sofre moras oi-oin no labarik sira hela do’ok husi sira nia eskola no hospital. Despeju sira ne’e rezultadu ema lakon uma no mós hamosu violasaun direitus umanu sira seluk no estadu tenke foti medidas apropriadu sira hotu hodi hametin alojamentu alternativu adekuadu no halo realokasaun orsamentu ne’ebé sufisiente no espasu rai ne’ebé nato’on hodi hari uma antes halo despeju.

Ezemplo primeriu: Iha loron 20 fulan janeiru tinan 2011 Ministeriu Justisa liu husi Diresaun Terras e Propriedade hasai despaisu atu halo eviksaun hasoru komunidade uma kain 175 iha Eis. Kampaun  Brimob-Agora BOP nia kampaun iha Bairu-Pite Dili, maske maioria husi vitima sira ne’e hetan kompensasaun husi governu maibé valor husi saida mak sira hetan labele garante sira nia vida moris. Aleinde ne’e iha komunidade uma kain 28 ne’ebé la hetan kompensasaun to’o ohin loron sira kontinua hela iha bairu aitarak laran ho kondisaun hela fatin ne’ebé vulneravel no la seguru.

Ezemplu Segundu: Iha Loron25 Setembru 2015 Ministeriu Justisa liu husi Diresaun Terras e Propriedade hasai despaisu uma kain 18 ho total komunidade hamutuk 101 hetan eviksaun obrigatoriu husi governu iha aldeia 20 de setembru Suku Comoro. Maioria husi vitima sira ne’e la hetan kompensasaun direita husi governu maibé sira kompensasaun fila fali husi kompaña hodi utiliza rai refere.[1] Tuir Konvensaun Internasional Direitu ekonommia sosoial no kultura, habadak ho Sigla (KIDESK) ne’ebé governu Timor leste ratifika iha tinan 2003 iha konvensaun ida ne’e komite bá komvensaun fó komentariu jeral iha No.7 temi katak: “Hasai ema ida husi uma ka rai ne’ebé nia hela labele halo ema ne’e sai fali ema ida uma laek ka sai vulneravel violasaun direitus humanus sira seluk. Bainhira ema afetadu ida

labele tau matan bá nia an rasik, Estadu partisipante tenke foti medidas hotu-hotu to’o iha ne’ebé nia rekursu bele husik, hodi asegura uma/abrigu alternativu no adekuadu bá ema ne’e nia bele hetan asesu bá rai ne’ebé nia bele hetan asesu bá rai ne’ebé bele produs ai han, se ida ne’e mak situasaun ne’e envolve.”[1]

Politika Governu Ba Implementasaun Dezenvolvimentu Governu Implementa Polítika atu hasai komunidade sira ho objektivu atu halo Dezenvolvimentu. Tanba Dezenvolvimentu nudar pilar importante hanesan motor ba dezenvolvimentu nasional, Governu Timor-Leste halo dezenvolvimentu konserteza sei kona komunidade ká povu nia kintal ká hela fatin, maibé governu sei fó kompensasaun. Iha Konstituisaun Repúblika Demokratíka de Timor-Leste nian, habadak ho Sigla KRDTL, (Artigo 6) Estadu nia Objektivu sira,[2] liu liu hakerek iha aliña b, Garante no promove sidadaun sira-nia direitu no liberdade fundamentál, no respeitu bá Estadu nia prinsípiu kona-bá direitu demokrátiku; aliña c, katak defende no garante demokrasia polítika no partisipasaun populasaun nian kona-bá rezolusaun problema nasionál sira; no aliña d, haktemi katak Garante dezenvolvimentu bá ekonomia, bá progresu siénsia no téknika. Aleinde ne’e mós iha direitu ba rai hetan protesaun iha konstituisasun, Artigu 540.  Tan ne’e mak atu garante utilidade iha propriedade, estadu rasik mós tenke hare direitu bá rai ne’ebé estabelese iha lei No 1/2003 de 10 de Dezembru, artigo 3 hateten katak ema hotu-hotu iha direitu bá moris, bá liberdade no seguransa bá nia an rasik. Nune mos lei No 13/2017 De 5 de Junho,
[1]Konvensaun Internasional Direitu ekonommia sosoial no kultura Lei Nu 1/2003 de 10 de Dezembru.P.33. [2] Konstituisaun Republika Demokratika de Timor-Leste (RDTL).Vigor iha Loron 20 de Maio de 2002. P. 9.

Regime Espesial bá Definisaun Titularidade Bein Imovel,[1] artigo 8 aliña 6 hateten katak Titular bá direitu uluk nian ká deklarante ne’ebé prinxe rekezitu uzukapiaun espesial ne’ebé tuir termu lei ne’e, tenke hetan rekoñesimentu bá direitu propriedade kona bá bein imovel, maibe lakon direitu tanba bein tama iha dominiu publiku estadu nian, tenke hetan indeminizasaun, Iha sorin seluk konseitu dezenvolvimentu atual iha risku no lori ameasa bo’ot bá komunidade kiak no vulneravel sira sei lakon moris subsitensia, lakon kultura no mós rendimentu familiar. Nee sei aumenta kiak sai aas liu tan, tanba deit konseitu dezenvolvimentu politika rai ne’ebé produz husi estadu hodi foti povu kiak nia rai produtivu hodi harii mega projetu sira iha ne’ebé fó sira nia importansia bá lukru ekonomia duke bá produsaun aihan iha rai leten hodi sustenta povu nia moris mak sustentavel no ekuitavel. Politika sira ne’e hadalan bá halo eviksaun forsada no foti rai obrigatoriu hodi haforsa ukun nain sira nia poder no ukun ho naran bá interese publiku no mós ekonomia nasional, estadu dezenvolve politika oi-oin, iha ne’ebé halo eviksaun forsada no foti rai obrigatoriu husi povu kiak hodi ameasa bá sira nia vida buka moris, hela fatin, kultura no rendimentu familiar. Fenomena sira ne’e tenke hetan atensaun husi ema hotu-hotu.

Prosesu Indeminizasaun

Tuir Lei Projeitu ne’ebé kona rai privadu no rai estadu governu sei fó kompensasaun ne’ebé justu no prepara fatin bá komunidade sira bele hela iha fatin sira ne’ebé sei mamuk no prepara kondisaun ho adekuadu no  atu hasai ema ida iha nia propeidade privada hodi halo bá uzu publiku tenke selu indeminazasaun lolos tuir lei haruka. Bainhira despeju ne’e inevitabel, no nesesariu duni bá promosaun moris diak jeral nian, estadu tenke fornese ká garante kompensasaun ne’ebé ekuitativa no justu bá kualker perda pesoal, real ká propriedade ká sasan sira seluk, inklui direitu ká interese sira iha propriedade nian. Tenke fó kompensasaun bá kualker estragus sira ne’ebé ekonomikamente avaliavel, iha forma ne’ebé adekuadu no aproporsional bá gravidade husi violasaun ne’e no mós sirkuntansia sira husi kazu ida-idak nian, hanesan: Lakon vida ká parte ruma husi isin lolon nian; danu fizika ka mental nian; oportunidade sira ne’ebé lakon, inklui empregu, edukasaun no benefisiu sosial sira; estragu material sira no lakon rendimentu, inklui lakon potensia ba rendimentu nian, no kustu sira ne’ebé nesesariu bá asistensia legal ká espesialista nian, ai-moruk no servisu mediku sira, no mós servisu sira psikologika no sosial nian. Kompensasaun ho osan nian, iha sirkunstansia ne’ebé deit, labele substitui kompensasaun real iha iha forma bá rai no rekursu sira propriedade komuni nian. Iha situasaun ne’ebé mak rai ne’ebé foti ona, ema ne’ebé hetan despeju tenke kompensadu ho rai ne’ebé aproporsionadu iha kualidade, ninia bo’ot no valor, ká diak liu. Vítima ká ema ne’ebé afetadu tenke hetan indemnizasaun dignu no justu. Estadu iha obrigasaun atu halo indemnizasaun ne’ebé dignu no justu bá  vítima afetadu sira bá kualkér konstrusaun públiku no privadu tuir Lei No.8/2017 Kona bá Espropriasaun bá Utilidade Públiku tuir provizaun sira mak hanesan:

Artigu 59. Publika Indeminizasaun[2]

1. Konsidera informasaun publika valor, bein imovél ká kualkér direitu seluk ne’ebé

transmite ona ho títulu indemnizasaun

2. Entidade benefisiaria bá espropriasaun publika iha Jornál Repúblika kona bá valor

ne’ebé selu ona ká bein imovél ne’ebé entrega hanesan alternativa bá indemnizasaun tuir termu lei ida ne’e.      

Artigu 60. Meiu sira hodi selu indemnizasaun

1. Indemnizasaun bá espropriasaun tanba utilidade públiku sei selu ho osan dala ida

de’it ká ho espésie liu husi fó bein ekivalente, exetu bá exepsaun sira ne’ebé prevee

iha númeru tuir mai.

2. Kona bá akuzasaun liu husi direitu privadu, parte sira bele konkorda selu

indemnizasaun liu husi prestasaun ká fó bein ká direitu ne’ebé konkorda ona ho ida

ne’ebé prevee iha artigu tuir mai

Konkluzaun

Estadu atu hasai ema ida husi uma ka rai ne’ebé nia hela labele halo ema ne’e sai fali ema ida uma laek ká sai vulneravel violasaun direitus humanus sira seluk. Bainhira ema afetadu ida labele tau matan bá nia an rasik, Estadu partisipante tenke foti medidas hotu-hotu to’o iha ne’ebé nia rekursu bele husik, hodi asegura uma/abrigu alternativu no adekuadu bá ema ne’e nia bele hetan asesu bá rai ne’ebé nia bele hetan asesu bá rai no uma.

Referensia :

Konvensaun Internasional Direitu ekonommia sosoial no kultura Lei Nu 1/2003 de 10 de Dezembru.

Konstituisaun Republika Demokratika de Timor-Leste (RDTL). Vigor iha Loron 20 de Maio de 2002.

Regime Espesial ba Definisaun Titularidade Bein Imovel , Lei No 13/2017 De 5 de Junho.

Kona ba prosesu indemnizasaun nian ho nia detallu informasaun sira asesu iha: Artigu, 59 – 64 iha LeiNo.8/2017 kona ba Lei Espropriasaun tanba Utilidade Públiku Versaun-Tetum, Ministériu da Justisa, 2014.
[1] Regime Espesial ba Definisaun Titularidade Bein Imovel , Lei No 13/2017 De 5 de Junho. P.10.

[2] Kona ba prosesu indemnizasaun nian ho nia detallu informasaun sira asesu iha: Artigu, 59 – 64 iha LeiNo.8/2017 kona ba Lei Espropriasaun tanba Utilidade Públiku Versaun-Tetum, Ministériu da Justisa, 2014, P.98-105.



Print Friendly, PDF & Email

LEAVE A REPLY

Please enter your comment!
Please enter your name here