Home Notisia Sesta Bazika, Benefisiariu Aldeia Fatukama Lamenta Ho Presu, Lita Store: Presu Bazea...

Sesta Bazika, Benefisiariu Aldeia Fatukama Lamenta Ho Presu, Lita Store: Presu Bazea Ba Kontratu

611
0
benefisiariu sira hili sira nia nesesidade iha sesta bazika. [Foto: Marcio Morato Pinto | 12.01.2021]

Reportazen Marcio Morato Pinto

“Presu ba sasan sira ne’ebe iha bazeia ba akordo entre Governu ho Lita Store, no ami la aumenta no hamenus. Ami nia fraqueza maka la taka presu ba sasan sira ne’e, liu liu iha raga sira ne’ebe sasan iha”. Rafael Cardoso.

Komunidade hosi aldeia 3 Fatukama, área Metiaut hahu simu sira nia direitu tuir programa Sesta Bazika ne’ebe VIII Governu oferese ba populasaun. Aldeia refere hamutuk 325 voucher maka prepara, atu simu sira nia ai-han iha armazém Lita Store-Lecidere.

Sesta bazika iha fatin refere ba loron ba dahuluk nian, benefisiariu barak lamenta tebes ho presu ne’ebe iha no governu la kontrola kompania sira ne’ebe hetan tenderizasaun, atu implementa Sesta Bazika.

Liu hosi entrevista ho benefisiariu Justo Gama da Silva hela iha aldeia 3 Metiaut ne’ebe iha membru familia iha nain tolu, ba Neon Metin hateten la konkorda ho presu sasan ne’ebe maka iha, tamba sasan ne’ebe nia foti la to’o ho montante osan U$150.00.

“Sasan ne’ebe hau foti parese iha U$ 20.00 ka U$30.00 deit, nune’e hau sente simu osan diak liu, tamba sistema presu ba sasan sira ne’e la kona hau nia laran, at liu tan maka bainhira hau atu ba foti sasan, staff Lita Store dehan ida ne’e labele foti, selae osan la to’o entaun sira maka foti fó hau” dehan Justo Gama ba Neon Metin iha Armazém Lita Store, Licidere, 11/01.

NiaHo esplika katak sasan sira ne’ebe staff Lita Store foti fó ba nia mesak sasan ne’ebe la tuir nia hakarak, nia koko koalia ho makaas ba staff sira maibe sira nonok hotu.

Iha fatin hanesan benefisiaria Ana Paula hosi aldeia 3 Fatukama área Metiaut, iha membru familia nain tolu, apresia ho programa ne’ebe governu halo ba ninia povo, maibe iha parte seluk nia la konkorda ho presu sasan ne’ebe maka loja Lita Store iha, tamba sasan sira la to’o ho montante U$ 150.00 no balu la tuir saida maka familia sira hanoin atu foti.

“Tuir hau nia hanoin simu osan diak liu, tamba ita bele hatene diak liutan saida maka uma laran presisa no ita rasik ba loja sosa sasan ne’ebe ita hanoin atu foti. Sasan sira ne’ebe hau foti bele sustenta hau nia uma laran maibe hau la kontente tamba sasan sira ne’e la tuir presu sasan nian no sira la taka presu ba sasan sira ne’e”, dehan Ana Paula.

Nia rekomenda karik iha futuru halao nafatin programa ida ne’e, nia husu atu tau sasan ne’ebe maka povo kiik presiza no tau presu ne’ebe lolos ba sasan sira ne’ebe iha.

Hatan ba halerik presu sasan hosi benefisiariu sira, Maneger Sesta Bazika Lita Store, Rafael Cardoso esplika katak presu ba sasan bazeia ba Kontratu ne’ebe Governu fó.

“Presu ba sasan sira ne’ebe iha bazeia ba akordo entre Governu ho Lita Store, no ami la aumenta no hamenus. Ami nia fraqueza maka la taka presu ba sasan sira ne’e, liu liu iha raga sira ne’ebe sasan iha, maibe hahu ohin ami taka ona presu ba sasan sira ne’e tuir Governu fó mai ami. Ohin parte Alfaesa mai investiga hodi foti lista ba presu sasan sira ne’ebe maka iha”, esplika Maneger.

Entretantu atendimentu ba Sesta Bazika iha Lita Store, Maneger sei hadiak atu nune’e staff sira bele atende benefisiariu ho diak no justu, tuir saida maka benefisiariu sira hakarak no presiza iha sira nia uma laran. 

Print Friendly, PDF & Email

LEAVE A REPLY

Please enter your comment!
Please enter your name here