Home Notisia Wer Ulun-Laklubar Sedauk Asesu Estrada, Frangelina: Ami Tutur Deit Sasan Ba Merkadu

Wer Ulun-Laklubar Sedauk Asesu Estrada, Frangelina: Ami Tutur Deit Sasan Ba Merkadu

317
0
agrikultor Frangelina Soares hela iha Wer-Ulun. [Foto: Adroaldo | 20.01.2021]

Reportazen Adroaldo ‘Saretukau’

Komunidade Wer-Ulun, suku Batara, Postu Laclubar seidauk asesu estrada, ho nune’e difikulta agrikultor sira hodi lori sira nia produtu hodi asesu merkadu

Jornalista Neon Metin dada lia ho Wer-Ulun, agrikultor Frangelina Soares hela iha Wer-Ulun konaba situasaun Estrada at. Ba Neon Metin nia tenik katak aldeia Wer-Ulun sedauk asesu Estrada tanba ne’e bainhira ba merkadu iha postu Laclubar, hodi faan sasan lao iha hosi dalan kiik no susar atu lori sira nia produtu ba merkadu.

“Estrada mos la tama, ami lori sasan mai merkadu haklulu no tutur de’it, sira ne’ebé kuda iha mak tula ba kuda”, tenik Frangelina, iha Postu Laclubar, 17/01,

Nia hatutan produtu ne’ebé sira lori ba fa’an mak hosi buat saída mak sira kuda no eziste iha sira nia fatin, “tempu udan ne’e ami lori abokate, has mai fa’an, tempu bai-loro ami lori koto, ai-farina, fehuk, ai-manas ai-lolon no sukaer”.

Agrikultor ne’e husu governu atu bele tau matan ba sira, hodi loke dalan ba sira nia fatin, hodi nune’e hafasil sira nia viajen ba mai, inklui sira nia oan ba eskola.

 “Na’i ulun sira haraik dalan di’ak mai ami, tanba ami nia dalan ne’e la’o susar tebes, tanba rai naruk, la’o liu hosi de’it du’ut laran, ami lori sasan no mos ami nia oan ba eskola mos hosi de’it du’ut laran mak la’o ba ne’e”, hateten Frangelina ho esperansa boot karik governu bele hadia halo estarada

Relasiona ho problema ne’ebe agrikultor sira hasoru, Neon Metin halo entrevista ho lider suku Batara, Thomas Pinto, ba Neon Metin nia dehan estrada kilo balun halo ona maibé balun seidauk.

“Hosi vila ba to’o aldeia Wer-Ulun iha kilometru 8, estrada ne’ebé asesu ona hamutuk kilometru 4 sei falta kilometro 4 mak seidauk bele asesu”, dehan Thomas.

Lider komunitáriu ne’e hateten komunidade nia kontribuisaun ba estadu mak halo aktividade agrikultura, haruka oan ba eskola. Tanba ne’e presiza dezenvolvimentu infra-estrutura iha nia suku atu bele fasilita komunidade sira nia moris.

“Maibé dezenvolvimentu ne’ebé ami presiza mak ahi ho estrada. Ami la husu osan ba governu maibé ami husu mak ahi, estrada para ami bele asesu ba merkadu”, Xefe Suku Thomas ba Neon Metin iha Suku Batara, 15/01.

Tanba ne’e nia husu ba governu bele tau matan ba problema ne’ebé nia komunidade sira hasoru. Nia husu atu governu bele tun direita hodi haree ba problema ne’ebé nia komunidade sira hasoru.

Xefe Suku Batara mos hateten esforsu no hato’o ona prosposta ba governu, maibé seidauk hetan resposta to’o ohin loron. Maibé nia ho esperansa hodi hein nafatin no espera katak governu bele loke matan ba problema ne’ebé nia komunidade suku Batara hasoru.

Print Friendly, PDF & Email

LEAVE A REPLY

Please enter your comment!
Please enter your name here