Reportazen Franciso JDA
Kazu pedofilia (abuzu sexua ne’ebe halo labarik feto sira) iha orfaun Topu Honis no sai diskusaun publiku iha sosial media, hosi kazu ida ne’e Grupu Mulheres Parlamentar Timor Leste (GMPTL) kontinua hala’o esforsu hodi buka tuir kazu refere.
Iha tinan 2019 bainhira GMPTL tuir atividade balun kona ba asuntu feto nia iha Oe-Cusse buka dalan atu vizita fatin Topu Honis maibé iha impedimentu balun ne’ebé difikulta deputadu sira liu-liu GMPTL no membru sira atu ba visita fatin refere.
Presidente GMPTL, Lidia Norberta iha sala plenaria hateten akompanhamentu kona ba kazu Topu Honis ne’e GMPTL esforsu hela no GMPTL sempre buka atu hatene informasaun sira.
“ Iha akompanhamentu ba asuntu ida ne’e iha, laos dehan la iha, ami sempre buka informasaun hosi parte sira ne’ebe durante ne’e liga ho asuntu ida ne’e, organizasaun feto barak sira halo hela esforsu iha kotuk, sira halo buat barak ne’ebe iha hela iha momentu certu sira. Ba oin wainhira fulan ida ne’e kuandu iha julgamentu, ami sei akompanha bele dehan presensial ou nao presensial ami labele asegura iha ne’e, maibé ami sei akompanha prosesu ida ne’e para bele hare nia ba to’o iha ne’ebe,” hatete Presidente GMPTL Lidia Norberta bainhira halao diskusaun ho Governu Iha PN, 08/03
Iha fatin hanesan Vise Presidente Parlamentu Nasional, Maria Angelica Sarmento iha intervensaun hatete katak, problema kona ba violasaun doméstika no violasaun sexual ne’e laos problema feto deit, maibé problema nasaun nian, entaun presiza asegura nune’e bele to’o iha justica.
“Hau triste oituan wainhira koalia kona ba violénsia doméstika, violénsia sexual liga ho kazu Topu Honis, ita sempre hatudu ba feto saida mak GMPTL halo, asuntu violénsia doméstika no sexual ne’e laos problema feto nian deit, ne’e problema nasaun nian. Kuandu problema nasaun nian laos responsabilidade feto nian. Ita hanesan legislador hare ba ida ne’e saida mak ita bele halo atu kontribui, GMPTL halo aprosimasaun lubuk ida, atu asegura katak kazu ida ne’e lori duni ba prosesu justice. GMPTL la presiza denuncia maibé importante mak atu asegura katak prosesu lao duni,”, hateten Vise Presidente Parlamentu Nasional.
Oras ne’e dadauk arguido RD halao hela prosesu julgamentu iha tribunal Oe-cusse no tuir olanu sei kontinua tan iha loron 22 Marsu.
