Reportajen Francisco JDA
Xefe Bankada Partidu Kongresu Nasionál Rekonstrusaun Timor (CNRT) konsidera estudante sira sai vitima ba prosesu aprendizajen, tanba governu kontinua implementa Konfinamentu Obrigatóriu, tanba kazu COVID- 19 kontinua aumenta iha Timor-Leste, maski dehan Vasina Pfizer ba labarik sira iha maibé to’o agora la hatene iha ne’ebé
Tuir Xefe Bankada CNRT, Deputadu Duarte Nunes ba jornalista sira hateten katak, estudante sira besik tinan ida ona la estuda, tanba la iha aula prezensial, hela iha uma mós baruk ona, estudante barak iha loron hodi deside fa’an sasán ba sustenta nesesidade lor-loron nian
“Ita hare ita nia oan la’o iha luron sira ne’e, bele iha uma la iha buat ida atu han, ita hotu hatene katak, populasaun la iha kondisaun sustenta nia oan sira, problema jerál ba hotu-hotu, oan sira ne’e faan sasan ne’e ita preokupa,” hatete xefe Bankada CNRT Deputadu, Duarte Nunes iha Parlamentu Nasionál, 25/08
Deputadu ne’e subliña, alende la iha buat ida para han, eskola mós la iha, fo impaktu ba jerasaun oin mai, tanba ema nasaun barak taka eskola maibé iha online, realidade iha Timor labarik barak la eskola tanba tauk Covid-19
Deputadu ne’e dehan, Vasina ba labarik sira to’o agora la iha, nune’e dehan vasina Pfizer atu mai maibé to’o agora seidauk iha data fixu lolos, se labarik sira kontinua la eskola sei fo impaktu ba jerasaun foun.
Nune’e hare ba Kazu Covid-19 ne’ebé kontinua aumenta kada loron, tanba ne’e ohin governu mós deside ona atu aplika Konfinamentu Domisiliario durante semana ida hahú hosi 27 Agostu to’o 2 Setembro oras 00:00 iha Municipiu Dili.
Entretantu dados jeral ba COVID-19 ohin loron 25 Agostu tinan ne’e, kazu foun 361, kazu rekuperadu 144, kazu ativu baixa iha izolamentu 4,052, kazu óbitu ohin nain 1 no total óbitu hamutuk 52, total kazu konfirmadu kumulativu sura husi 21 Marsu 2020 to’o mai ohin loron hamutuk 15,296.
