Home Notisia Governu Xina Apoiu $1 Millaun, Hodi Fo Asisténsia Ba Inan Isin Rua...

Governu Xina Apoiu $1 Millaun, Hodi Fo Asisténsia Ba Inan Isin Rua no Malnutrisaun

661
0
MS ho governu Popular Xina hasai foto hamutuk. [foto: David | 28.10.2021]

Reportajen David da Costa Gusmao

Governu Repúblika Popular Xina serbisu hamutuk ho programa ai-han mundiál (PAM) hodi apoiu  $1 millaun ba governu Timor-Leste,  atu halo asisténsia ai-han emerjénsia ba inan isin-rua, no inan fó susu iha Timor-Leste ne’ebé sofre ba malnutrisaun.  

Kontribuisaun ne’e sei utiliza hodi fornese ai-han nutritivu hamutuk tonelada 548 ba inan isin-rua, no inan fó susu hamutuk 12,000 resin, atu konsumu kada fulan durante fulan 12. Fundu ida ne’e sei uza atu fornese ai-han suplementu hodi prevene kazu malnutrisaun, ho objetivu atu redús númeru mortalidade liu-liu ba inan sira mak iha risku aas no sofre ba malnutrisaun, liu husi fó suplementu mikronutriente ba sira.

“Akordu kontribuisaun entre Governu Repúblika Popular Xina no Governu Timor-Leste liu husi PAM mai iha tempu ne’ebé ita presiza duni atu fó apoiu ba ita nia ema. Tanba ne’e, hodi inan isin-rua no inan fó susu sira iha Timor-Leste nia naran, ha’u hakarak hato’o agradese wainin ba suporta no kometimentu jenerozu husi Governu Xina,”dehan  Ministra Saúde (MS),  Odete Maria Freitas Belo iha serimónia lansamentu ba akordu kontribuisaun entre Governu Xina no Program Ai-han Mundial (PAM) iha Palacio da Cinzas, kaikoli, Kinta 28/10.

Nia dehan iha Timor-Leste, problema seguransa ai-han no malnutrisaun kontinua sai dezafiu bo’ot, populasaun liu 1/3 mak sofre ba inseguransa ai-han. Labarik tinan 5 mai kraik hamutuk 47% mak nia altura la tuir nia idade, 8.6% krekas, no isin ki’ik ka todan menus hamutuk 32%. Inan ho idade reprodutiva sira hamutuk 30% maka sofre ba anemia.

Impaktu husi surtu COVID-19 no inundasaun iha fulan Abríl afeta seguransa ai-han no nutrisaun iha territóriu laran tomak, kauza refere fó impaktu ba ema nia moris loron-loron, afeta mós korrente fornesimentu no funsionamentu merkadoria. Ezemplu, uma kain hamutuk 38% mak minimiza sira nia dieta nutritivo, ho razaun tanba osan no rekursu laiha, no tuir rezultadu asesmentu sósiu-ekonomia ne’ebé relata husi Governu Timor-Leste katak ema balun mós la konsege han pelumenus loron ida dala tolu.

Reprezentante PAM iha Timor-Leste, Dageng Liu dehan PAM orgullu ho kontribuisaun jenerozu husi Xina. Asisténsia ai-han, inklui asisténsia saúde komunidade no servisu nutrisaun, sei ajuda hakotu síkulu interjenerasion.

Embaixadór Xina iha Timor-Leste, Xiao Jianguo Xina sempre disponivel atu haforsa koordenasaun no parseria servisu hamutuk ho ONU no ajuda Timor-Leste hodi atinji Objetivu Dezenvolvimentu Sustentável 2030 atu hakotu hamlaha no halo transformasaun ba sistema ai-han.

Fundu husi Governu Xina, liu husi the South-South Cooperation Assistance Fund (SSCAF) sei fó biban ba PAM atu hola super cereal – ai-han ne’ebé – fortifika ho vitamina no minerál. Ai-han nutritivu ne’e sei distribui liu husi Ministériu Saúde no servisu hamutuk ho SAMES (Servisu Autónomo de Medicamento e Equipamento de Saúde) ba iha munisipiu 12, inklui RAEOA-Oekusse.

Print Friendly, PDF & Email

LEAVE A REPLY

Please enter your comment!
Please enter your name here