Reportajen Bernarda da Costa, Adalgisa Pereira
Universidade Nasional Timor-Lorosa’e UNTL, sai vensedor ba Festival Desportu Akadémiku Timor- Leste FESDATIL ho taxa hamutuk 27 inklui Taxa rotativa.
Objetivu husi eventu ida ne’e, hodi oferese oportunidade ba universidade sira, atu espresa sira nia talentu iha modalidade desportiva, nó halo selesaun ba melhores atleta sira husi universidade sira .
Reitór Universidade Nasionál Timor-Lorosa’e UNTL, Professor Dr. Joao Soares Martins orgullu tanba UNTL bele hetan primeiru lugar iha FESDATIL ho taxa hamutuk 27 inklui taxa rotativa, maske iha universidade barak maka kompete, maibé atleta no jogadore sira hamorin nafatin UNTL nia naran.
“Hau husu ba atleta no jogadore sira husi UNTL atu kontinua nafatin treinu, hodi hadi’a nafatin imi nia jogu bele sai diak liu tan, hodi nune’e bele sai nafatin atleta no jogadore ne’ebé diak iha futuru bele lori Timor nia naran ba mundu” dehan Reitór UNTL iha SEJD Lecidere,Kinta 25/11.
Iha parte seluk komisaun organizadora, Joviano Alves Reis haktuir komisaun organizadora nota katak atleta husi Universidade sira partisipa masimu, maske iha universidade no intituisaun balun iha difikuldade oioin durante joga ida nee, tan nee komisaun ida nee laos anima deit universidade maibe mos publiku jeral sira
“Aktividade ne’e susesu tamba hetan apoiu husi SEJD ninia finansiamentu hamutuk 31 mil no mos kontribuisaun teknika husi federasaun sira neebe partisipa direita iha eventu ida nee hanesan Federasaun voleiból, Federasaun Taekwondo Timor-Leste, Federasaun atletizmu Timor-Leste, Modalidade Futeból no modalidade xadrés, ne’ebe mak apoiu FESDATIL hodi realize eventu ne’e husi inisiu to’o remata”dehan nia.
Iha jogu ne’e UNTL maka sai manan nain ho taxa hamutuk 27, segundu lugar husi DIT ho taxa 7 no terseiru lugar husi UNPAZ ho taxa 3.
