Home Justisa Kazu Topu Honis, Advogadu Vitima: Arguidu Devia Simu Kastigu Másimu Tinan 30...

Kazu Topu Honis, Advogadu Vitima: Arguidu Devia Simu Kastigu Másimu Tinan 30 Tuir Lei

2387
0
Advogadu privadu lezada (vítima) nian, Dr. Olivio Barros.[Foto: Oqui | 21.12.2021]

Reportajen David da Costa Gusmao, Celisto dos Santos Oqui

Advogadu privadu lezada (vítima) nian, Dr. Olvio Barros deklara ohin 21 Dezembru 2021, marka istória importante iha setór justisa iha Timor-Leste,  Tribunál Distritál Oecussi (TDO) foti desizaun hodi kondena arguidu ba krime abuzu seksuál hasoru labarik-feto na’in 4 iha orfonatu Topu Honis, ho vitima 2 nia krime preskreve ona. Tribunál mós determina kastigu prizaun tinan 12.

Ba jornalista sira nia dehan kazu ida-ne’e hanesan kazu violénsia seksuál boot liu ne’ebé registu iha Tribunál iha Timor-Leste tomak, haree ba númeru vítima no haree ba akontese iha tempu naruuk nia laran.

“JU,S Jurídico Social, ne’ebé reprezenta vítima na’in 9 iha kazu ida-ne’e, lori vítima nia naran hodi deklara katak,mezmuké Tribunál kondena arguidu, ho kastigu prizaun tinan 12 la refleta gravidade hosi krime no prátika hosi Tribunál,” advogadu privadu vitima nian esplika bainhira remata lee leitura ba iha kazu Topu Honis iha TDO, Tersa 21/12.

Nia haktuir tuir loloos, haree ba gravidade krime, arguidu devia simu kastigu másimu tuir lei iha Timor-Leste, tinan 30 iha prizaun. Ho nune’e, vítima sira la konkorda ho kastigu ne’ebé Tribunál fó ba arguidu, no sei halo rekursu.

Kondenasaun ba arguidu sei la hamate terus no sei la halakon fitar ne’ebé vítima sira sente ba sira-nia moris tomak. Kondenasaun no kastigu mós sei la fó fila labarik no joven feto sira-nia moris hodi haksolok, hamnasa no halimar.

“Apezárde kastigu la todan, desizaun hosi Tribunál ohin loron hatudu katak arguidu sala duni. Arguidu komete duni krime lubuk ida hasoru labarik-feto ne’ebé iha ninia mahon”,dehan Dr. Olivio

Kondenadu hosi Tribunál uluk nu’udar Padre, no hetan ona demisaun hosi Igreja Katólika tanba aktu hanesan,”tenik nia.

Nia salienta eis padre Amerikanu ne’e uza ninia influénsia nu’udar Diretór orfanatu, ninia pozisaun nu’udar Padre no aproveita vulnerabilidade komunidade lokál hodi halo abuzu seksuál ba labarik ne’ebé nia tau-matan bá.

“Mezmu ami la haksolok ho desizaun ida-ne’e, ami, ne’ebé reprezenta vítima, nafatin apresia esforsu hosi entidade hotu ne’ebé konsege termina prosesu ida-ne’e. Istória ne’ebé ohin ita hakerek, nu’udar istória moruk ba Timor-Leste tomak. Ita-nia oan rasik sai vítima durante tempu naruuk nia laran, tanba ita hotu taka matan no la fiar katak figura ida, hanesan kondenadu iha kazu ida-ne’e, sei komete violasaun grave ba labarik sira,” nia hatete.

Nia mós husu ba sosiedade tomak mai hamutuk aprende hosi istória ida-ne’e, no asegura sei la repete tan iha futuru.

Print Friendly, PDF & Email

LEAVE A REPLY

Please enter your comment!
Please enter your name here