Home Memoria Obituariu Companheiro Saudozu Zaimit Constantino Fernandes De Carvalho “Mau-Naha”

Obituariu Companheiro Saudozu Zaimit Constantino Fernandes De Carvalho “Mau-Naha”

2108
0
Saudoso Zaimit Constantino "Mau-Naha"

By Carlos Saky

Saudozu Zaimit Constantino Fernandes de Carvalho, moris iha loron 27 fulan Dezembru tinan 1979, husi Aldeia Osobubu, Suku Afaloikai, Posto Administrativo Uatu-Lari, Munisipiu Vikeke.  Oan husi na’i Jacob de Carvalho husi Nunumalau, husi Uma Lisan Boroloi-Loime, Uatu-Lari no lou Terezinha Fernandes (Falecida) husi Dasu-Ulu – Wagadere, husi Uma Lisan Irabin-Vessouru, Uatu-Karbau.  

Zaimit, husi ki’ik kedas kuinesidu ho naran sira Atino, Tinukai ka Mau-Naha. Mau-Naha, naran nebe fo ba nia desde nia moris mai. Nia naran Constantino no Mau-Naha foti husi nia tiun Constantino “Mau-Naha” Lopes nia naran, nebe oho iha Guerra Civil, iha Aisirimou, Aileu, iha inisiu 1976.

Bainhira Atino simu juramentu no sai militante Resistência Nacional dos Estudantes de Timor-Leste (RENETIL) nian iha Salatiga, Indonezia, nia mantein naran Mau-Naha nudar naran revolusionario ka naran funu nian, hanesan mos nia maun Gregorio Basilio de Carvalho nebe adopta nia avo Lobo-Dara nia naran ba naran revolusionariu. Iha ukun-an nia laran, saudozu kuinesidu mos ho naran Etno.

Iha Salatiga, kolega sira hotu kuinese nia ho naran Atino. Atino oan dahuluk husi maun-alin na’in 5. Maun-alin na’in 6 mak: 1) Zaimith Constantino Fernandes de Carvalho 2) Gerson Fernandes de Carvalho (mate sei ki’ik), 3) alin ida naran laek, moris mai mate kedas ona, 4) Rita Dolores Fernandes de Carvalho, 4) Ivia Elvira Fernandes de Carvalho, no 5) Gilman Fernandes de Carvalho. Saudozu Atino husik hela parseira ida, Adelaide Correia, husi Oe-Kusse.

Bainhira sei ki’ik, saudozu Atino hakiak husi nia tian, Olimpia Fernandes, nia pai nia bin. Iha 1984, Atino ho nia inan hakiak muda husi Uatu-Lari ba Dili. Liu tinan 6, iha 1990, nia inan hakiak mate. Bainhira nia inan hakiak mate, Atino halo tinan 11. Ho inan hakiak mate, nia fila hikas ba nia inan-aman iha Vikeke.

Iha 1986, Saudozu Atino hahu nia Eskola Primaria iha Sekolah Dasar Katolik (SDK) Luis Gonzaga, Balide. Seidauk halo hotu nia SD, ho Kelas 5 nia muda ba fali ba Sekolah Dasar Negeri 1 Vikeke, hafoin nia inan hakiak mate.

Hafoin konklui ninia Eskola Primaria iha 1992, nia maun sira husi Nunumalau, nebe barak estuda iha Salatiga, sira hakarak nia eskola ba oin. Tan ne’e, foin atu hahu pre-Sekundaria ka Sekolak Menengah Pertama (SMP), sira lori nia ba Salatiga, Indonezia.

Iha Salatiga, Saudozu Atino tama iha Sekolah Menengah Pertama Katolik (SMPK) Stella Matutina Salatiga, Jawa Tengah, Indonesia no konklui 1994. Hafoin nia halo hotu ninia SMP, nia kontinua ninia Eskola Sekundaria ka Sekolah Menengah Atas Kristen 1 Salatiga, Jawa Tengah, Indonesia. Halo hotu tiha ninia SMA, nia labele kontinua nia estudus ba iha universidade iha Indonezia, tanba tenki fila mai Timor.

 Iha tinan 2000, hafoin Timor-Leste hetan ninia libertasaun no ukun-rasik-an, Saudozu kontinua nia estudu iha Universidade Nasional Timor Lorosa’e, iha Faculdade Siencia Sosial e Política, nia foti Departamentu Administrasaun Publika ka Ilmu Pemerintahan. Nia livre teoria desde 2004, nu’udar finalista iha UNTL, maibe razaun balun halo nia la konsegue konklui nia estudus to’o nia fila hikas ba mundu seluk.

Iha Salatiga saudozu Atino nudar labarik ida nebe estuda no moris iha estudantes universitarios sira nia leet. Biar otas sei ki’ik nia ransu malu ona ho estudantes universitarius nasionalista sira, estudante sira nebe luta iha klandestina kontra okupasaun Indonezia iha Timor.

Biar otas sei ki’ik, moris ona ispiritu nasionalizmu no patriotizmu iha nia fuan. Nia akompanha atividade no reuniaun sira nebe halo husi Estudante Rezistensia sira nian. Ho konvivensia ho estudantes nasionalistas sira, halo nia hetan konxiensia nasionalista no patriotika lais tebes, nunee nia deside involve-an iha luta ba Timor-Leste nia ukun-rasik-an.

Iha inisiu 1998, Atino hola desizaun boot iha nia moris, nia desidi tama no simu juramentu nudar militante RENETIL, organizasaun Rezistensia Estudantil Timor oan sira nian nebe boot liu iha Indonezia. Nia tama iha Unidade Estrategica da Resistência (UNER) Venceremos, nebe hetan iha sidade Salatiga, Jawa Tengah, Indonesia.  Nia foin simu juramento no tama iha RENETIL iha inisiu 1998, maibe nia akompanha no partisipa ona iha atividade klandestina balun RENETIL nian desde 1994. Nia nudar membru RENETIL nebe otas ki’ik liu hotu membru sira hotu. Nia hola parte iha organizasaun klandestina RENETIL, organizasaun nebe halo asaun barak iha Indonezia, inkluindu manifestasaun no okupasaun ba Edifisiu Ministeriu Negosiu Estranjeiru Indonezia nian iha loron 12 fulan Junu 1998, nebe involve estudantes hamutuk rihun tolu resin hodi ijiji referendum no ukun-rasik-an ba rai no povu Timor-Leste. Manifestasaun nebe estudante Timor-oan sira halo iha Indonezia kontribui tebes ba halo monu rejime Soeharto nian no loke dalan ba referendum iha Timor hodi Timor-oan sira deside rasik ninia direitu ba ukun-rasik-an.

Iha 1999 Atino lafila mai Timor, nia tuir votasan iha Yogyakarta. Nia lafila hanesan ho ninia companheiro sira seluk, tanba ninia inan mak husu nia labele fila tanba problema seguransa. Iha tempo neba milisia Besi Merah halo operasaun makaas iha Dili, nunee mos milisia Naga Merah iha Vikeke. Estudantes sira sai alvu milisia sira nian. Atino nudar oan mane boot, nia inan lakohi milisia sira estraga nia, tanba estudantes Timor oan sira husi Jawa no Bali sai alvo milisia sira nian. Nunee mos nia inan hanoin se milisia ho militar sira Indonezia nian karik oho sira iha Vikeke, pelo menos Atino bele eskapa, tanba iha Jawa seguru liu. Hafoin referendum hotu, no lakon kontaktu ho familia sira, Atino desidi fila, nia fila hamutuk ho primeiru grupu refujiadu Timor-oan sira nebe organiza husi Nasoens Unidas.

Iha tempu ukun-an Saudozu Atino serbisu hanesan Free Lance iha United Nations Integrated Mission in East Timor (UNMIT) nudar Interpreter, iha tinan 2015 nia serbisu iha ONG Belun no tuir mai nia serbisu iha Centre for Peace and Development (CEPAD).

Saudozu Atino nudar ema ida iha paixaun ba disportu. Nia hola parte iha CDTL Confederação Desporto de Timor Leste (CDTL) no Associação Futebol de Viqueque (AFV) nu’udar  Koordenador Asistente Arbitrazem. Saudozu mos jogador diak fotebol no basketbol. Nia jogador Ekipa Asukai Loro sa’e husi 2000 – 2002 no iha ekipa Akademi UNTL 2002 – 2006 hanesan medio. Iha basketbol nia joga iha Team Cesar Dante, Quintal Boot, hanesan play maker. Nia mos gosta joga Xadres. Nia kuinesidu ho ema nebe iha multi talentu iha desporto.

Saudozu Atino mos nudar ema nebe ativu iha atividade sira Igreja nian. Nia ativu iha atividade Eskuteiru, FOSCA no Koru Santo Francisco de Assisi iha Igreja Balide, Dili. Iha Vikeke, saudozu mos hola parte iha atividade FOSCA nian iha Paroquia Nossa Senhora Imaculada da Conceição Vikeke. No ativu mos nudar Joventude Munisipiu Vikeke nian.

Iha loron 5 fulan Abril 2022, oras tuku 5 lorokraik, matebian hetan ataka ka moras iha kanuruk. Familia halo esforsu hodi lori nia ba iha Hospital Nasional Guido Valadares (HNGV). Iha Hospital, Professionais Saúde sira halo tratamentu hodi halo City Scan no rezultadu diagnostiku hatudu, hemorrogia celebral ka pendarahan otak. Familia no Profissionais Saude sira, halo esforsu hotu hodi salva Saudozu maibe Maromak nia vontade no domin ba nia boot liu. Maromak bolu hikas hikas Saudozu Atino ba Nia Kadunan Santu iha loron 6 fulan Abril tinan 2022, oras 06:24 dader.

Saudozu Atino, ema ida simples, edukadu, respeitozu, badinas, humilde, ransu malu ho ema hotu, lahatene hirus no sempre haksolok. Iha nebe de’it mak nia iha, ema hotu haksolok. Nia sempre halo humor hodi halo ema hotu kontente no hamnasa. Iha familia Nunumalau, nia ema ida nebe badinas no obediente. Bainhira husu nia atu halo buat ruma, nia nunka dehan lae, nia halo la’o nia serbisu ho responsabilidade. Iha familia, nia sai esperansa boot familia nian, tanba nudar ona mane boot.

Ohin saudozu Atino husik hela ita hotu, husik hela familia, no husik hela amigos no companheiros da luta sira hotu. Nia husik husik hela buat diak hotu, husik hela valor lubun boot ida, valor nudar foin sae Timor-oan ida ho espiritu patriotizmu no nasionalizmu ne’ebe as iha luta libertasaun nasional. Saudozu Atino, ema ida simples, aten brani no sempre hamnasa ho ema hotu.

Saudozu Atino fila ona ba mundu seluk, maibe nia husik hela ninia mehi sira, husik hela valores diak sira nebe nia iha. Mehi no valores sira kontinua moris no buras iha familia no Companherio da luta hotu nia memoria. Heroi nunka mate, heroi moris rohan laek, Saudozu Atino ninia mehi sira moris hamutuk ho ita nafatin no rohan laek. Ninia mehi sei kontinua nafatin husi ninia compenheiro da luta sira, mehi atu Timor-Leste ida moris iha dame, iha progresso no prospero ba Timor-oan tomak.

Adeus, Adeus, Adeus  Companheiro da Luta. Ate Sempre!

Print Friendly, PDF & Email

LEAVE A REPLY

Please enter your comment!
Please enter your name here