Reportajen Adroaldo “Saretukau”
Kandidatu Prezidente Repúblika (PR), Dr. Ramos Horta iha nia mensajen ikus durante debate PR iha Salaun Mahoka kuarta-feira, 13 Abril, ba povu doben Timor-Leste wainhira eleitu mak, sei tau matan ba povu ki’ik nia moris iha negósiu, agrikultor sira, estudante no joven sira nia kondisaun moris, ba traballador sira iha rai li’ur no inan no oan sira hotu.
Durante la kaer pasta nu’udar governante, Ramos Horta sempre vizita munisípiu sira hodi haree besik povu nia moris, sempre gasta osan ba povu sira iha Tutuala hodi hola sira nia produtu, vizita mos Amu Locateli iha Fatumaca, ko’alia ho estudante sira no hatene sira nia kondisaun moris oinsá.
“Tanba ne’e tinan lima mai ne’e ita haree, Prezidente Repúblika, Governu, Parlamentu, komunidade internasional, ita hadi’a kiak sira nia vida, ida ne’e mak prioridade absoluta ba ha’u, oinsá joven sira, estudante sira bele iha kondisaun ba sira estuda di’ak liu, oinsá kosok-oan sira bele hetan alimentasaun di’ak ba sira, para sira bele moris,” hato’o Horta ba eleitor wainhira eleitu nu’udar Prezidente Repúblika.
Nia hatutan, ba sei tau matan ba joven estudante sira iha Timor-Leste tomak i inkluindu sira iha li’ur, haree oinsá protesaun konsular, protesaun diplomátika, no loke embaixda ida forte iha UK (United Kingdom) hodi haree traballador sira ne’ebé servisu no eskola iha ne’ebá.
Nia hatutan durante nia vizita sira, hatene di’ak komunidade, negosiante nuu iha Largo de Lecidere, negosiante sira iha merkadu Maubisse, Same no Laklubar, iha Loes sosa sira nia produtu ne’ebé kualidade, orgániku no sein pur sentu di’ak ne’ebé di’ak ba saúde duke produtivu hosi rai li’ur.
