Reportajen David da Costa Gusmao
Governu liuhosi reuniaun Konsellu-Ministru, ohin delibeira atu autoriza Ministru Finansas (MF) hodi selebrasaun akordu kontribuisaun finanseira entre governu Timor-Leste ho Ajénsia Kooperasaun Internasionál Japoneza (JICA), no Governu Austrália.
Porta voz governu, Ministru Prezidénsia Konsellu Ministru, Fidelis Manuel Leite Magalhães, hateten, Konsellu Ministrus delibera atu autoriza selebrasaun akordu kontribuisaun finanseira entre Governu Timor-Leste ho Ajénsia Kooperasaun Internasionál Japoneza (JICA), kona-ba programa reabilitasaun urjente ba infraestrutura ne’ebé aat kauza husi inundasaun.
“Kontribuisaun finanseira husi JICA ne’e ho valór besik dolar amerikanu US$ 7.400.000 (dolar amerikanu millaun hitu rihun atus haat),” Ministru Prezidénsia Konsellu Ministru,” Fidelis Manuel Leite Magalhães, informa ba jornalista sira iha palasiu Governu, kuarta 22/06.
Nune’e mos ohin Konsellu Ministrus delibera mós atu autoriza selebrasaun akordu subsidiáriu entre Governu Timor-Leste no Governu Austrália, relasiona ho Programa Parseria ba Prosperidade Inkluziva (PROSIVU).
“Kontribuisaun finanseira husi Governu Austrália ne’e ho valór besik dolar amerikanu US$ 25.000.000 (dolar amerikanu millaun ruanulu-resin-lima), ne’bé sei utiliza entre loron 1 fulan-jullu tinan 2022 no loron 30 fulan-juñu tinan 2026,” dehan porta voz Governu.
Ho ida ne’e Konsellu Ministrus delibera ona atu indika Ministru Finansas hodi asina akordu ne’e lori Governu Timor-Leste nia naran.
