Reportajen Umbelina dos Reis
Forsa Falintil Defeza Timor-Leste (F-FDTL) realiza serimónia dezmantela relasiona ho ró militár ne’ebé mak atu hasai no destrui, decommission Navio Republika Demokrátika Timor-Leste Kamanasa, bazeia ba despaxu husi Ministru da Defeza ho númeru rejistu 1143, loron 11 Jullu 2022 hodi avate náviu Kamanasa, tanba nia kondisaun inoperasional ona.
Komandante Komponente Naval Kapitaun de Mar i Gera, Higino das Neves hateten, ró ida ne’e dezmantela tanba ita nia problema manutensaun, dezde governu Korea Súl oferese mai ita iha tinan 2010. Nia dehan ró tolu ne’e atu ajuda Komponente Naval atu aumenta nia kapasidade operasionál, maibé ro refere entrega tiha rua ba Polísia Marítima, ida hela ho komponente Naval.
“Ro kuandu to’o Timor-leste, la to’o semana ida, nia la konsege halo operasaun tanba ro ne’ebé tuan ona, antes simu husi governu Korea Súl, tanba Timor-Leste ladún iha kultura manutensaun, até agora ró paradu hela de’it, depois okupa fatin ne’ebé ita nia estadu prepara ba dezenvolve atividade komérsiu nian,” dehan Komandante Higinio ba jornalista sira iha Ponte Kais Dili, 22/07.
Nune’e nia dehan Ministru Defeza ho Jenerál Xefe Komponente Naval nia proposta, tenke desmantela ohin hodi entrega ba estadu, depois mak sira jere patrimóniu estadu mak jere. Tanba ró mai kuaze tinan 30, la halo operasaun nia kapasidade ekonomia labele ona, ne’e mak Timor-Leste la konsege uza ba halo operasaun saída de’it. Maibé ró ne’e halo manutensaun dala ida, maibé orsamentu la sufisiente entaun manutensaun ida ne’e la efetivu, nia dehan.
Aleinde ne’e nia dehan prepara di’ak rekursu foun, para simu ró patrullamentu Kabua husi Austrália, ne’ebé oferese mai Timor iha tempu badak.
Náviu NRDTL Kamanasa, inkorpora iha misaun servisu nu’udar Náviu de Gerra iha Instituisaun F-FDTL, Komponente Naval, 11 Setembru 2011. Primeiru Guarnisaun Komanda husi Primeiru Tanente Nicolau Sausa Guterres husi tinan 2011 até 2017, segundu guarnisaun Komandu husi Segundu tanente, Jacinto do Nascimento husi tinan 2017 até 2021, terseiru guarnisaun Segundu Komandu husi tanente, Gusmão Gonsalves husi tinan 2021 até Náviu ida ne’e hetan decommission.
Ho nunee mak Komandu F-FDTL termina ona nia misaun operasionálidade husi NRDTL Kamanasa no deside halo des-korpora ba Náviu ne’e.
