Home Memoria Francisco Mak Tula Jornalista nain 5 Ba Balibo: Sira nia Dedikasaun Luta...

Francisco Mak Tula Jornalista nain 5 Ba Balibo: Sira nia Dedikasaun Luta Ba Liberdade Imprensa no Lia Los

653
0
Sasin no nudar kondutor iha tempu tula jornalista nain 5 ba Balibo. [Foto: David | 18.10.2022]

Reportajen Umbelina dos Reis

Komemora loron  trajédia Balibó Five ba dala-47, sasin ne’ebe konsege tula jornalista nain lima husi Dili Balibó, no ikus hetan oho husi militár Indonesia iha loron 16 Outubro 1975, enkoraja jornalista timoroan sira, atu banati tuir jornalista nain lima nia lalaok ne’ebe luta ba lia los, liberdade imprensa no espresaun

Iha loron importante ne’e sasin ba jornalista nain lima ne’e haktuir ba jornalista sira katak iha tempu ne’eba nia hanesan kondutór ba jornalista estranjeiru nain lima,  ne’ebe maka mate iha Balibó,  iha momentu ne’ebá hetan orientasaun husi Komité Central FRETILIN (CCF), hodi tula jornalista estranjeiru na’in lima mai iha Balibó atu halo kobertura, tanba inimigu  militár Indonesia tama ona iha Batugade. Bainhira tuir dalan laiha problema ida no konsege tula Jornalista nain 5 mai Balibo.

“Ami ekipa rua mak la’o hamutuk, ekipa ida mak ha’u ho Dr.Jose Ramos Horta, ekipa rua mak Mauk Moruk ho kolega ida naran Matias de Jesus, Iha loron 13 Outubru ami rua Dr. Jose Ramos Horta tula jornalista na’in 5 iha Ótel Turizmu Díli dader tuku 9:00 otl, to’o mai Balibó lorokraik, kalan toba iha uma sorin ne’e, fatin sunu lilin ne’e,  depois dadersan iha loron 14 mak ami ba kobertura iha kraik. Iha momentu ne’eba Indonesia okupa tiha ona Batugade, Iha momentu ne’eba ha’u hanesan kondutór no mos FALINTIL, Ramos Horta hanesan membru membru CCF,  ami tuir dalan laiha problema maske iha  Batugade ne’e tropas Indonesia Okupa,” nia konta tuir.

Francisco dehan la sentie tauk bainhira ajuda jornalista nain 5 ne’e hodi lori mai iha Balibó. Iha Balibó toba tiha kalan ida, depois iha dader sira nain lima hela hodi halo kobertura, no meudia ha’u ho Ramos Horta  fila kedas ba Dili. Banhira jornalista nain 5 mate, liu tiha fulan ida maka foin rona sira katak nain 5 nian mate.

“Iha momentu ne’eba ha’u tula sira, hau la sente tauk tanba hau mai ho kilat, depois jornalista na’in 5 ne’e hela iha Balibó ho kareta ida, Jornalista na’in 5 mate nee ha’u iha Atabae, iha madrugada tropas Indonesia mai asalta Balibo, depois liu tiha fulan ida resin mak ami foin rona informasaun dehan Jornalista na’in 5 nee ema oho tiha ona,” nia esplika.

Francisco iha tempu ne’eba ho idade 31, no nu’udar primeiru liña militár Portugés nian. Nia iha esperansa iha momentu tula jornalista na’in 5 mai Balibó, hanesan tula sira mai hodi sira hala’o sira nia kna’ar, buka informasaun hasai filmajen hodi pasa informasaun ba iha mundu internasionál katak tropa Indonesia sira mai invade ona Timor hodi oho Timoroan sira.

“Ha’u hanesan sasin ba jornalista estranjeiru na’in 5, ha’u enkoraja ba jornalista Timoroan no  foinsa’e sira estuda maka’as ho professional, hodi banati tuir jornalista na’in 5 nia ain fatin  ne’ebé fo-an ba mate, hodi defende lia loos no raí doben Timor-Leste, no luta ba Liberdade imprensa no espresaun,” dehan Fransisco ba jornalista sira bainhira partisipa iha  Lansamentu loron Nasional  Liberdade Imprensa iha Balibo, Domingo, 16/10.

Nia hato’o lia menon katk maske jornalista nain 5 laiha ona, maibé nafatin kontinua luta ba liberdade Imprensa liberdade no espresaun, tanba jornalista na’in 5 nia dedikasaun no profisaun mak ohin loron ema hotu halibur malu iha Balibó.

 “Mesmu sira laiha ona maibé ita kontinua luta ba Liberdade Imprensa liberdade expresaun, tanba Jornalista na’in 5 nia dedikasaun no  profisaun, mak ohin loron ita halibur malu iha Balibó nune luta ba liberdade imprensa  no lia los sei la mate”,  tenik nia.

Print Friendly, PDF & Email

LEAVE A REPLY

Please enter your comment!
Please enter your name here