Reportajen Umbelina dos Reis
Kuarta-feira semana ne’e, (16/11) iha oras 02:30, akontese inséndiu iha aldeia Abo-lir Suku Abo, Postu Administrativu Quelicai, Munisípiu Baucau, rezulta uma ida pertense ba vítima Tereza Soares, ahi han motuk hotu, la iha sasan ida mak hetan salva, oras ne’e sira hela provizóriu ho família.
Ba akontesimentu ne’e, Xefe Suku Abo, Fidelis dos Santos Sarmento haktuir kronolojia via telefone ba Neon Metin katak, akontesementu hosi inséndiu ne’e wainhira vítima hala’o atividade negósiu iha Postu Administrativu Quelicai no oan sira ba hotu to’os, derepenti ahi han motuk uma refere. Akontesimentu ne’e, sasán hanesan roupa, tais, dokumentus, hahan, livru no kadernu hosi vítima nia oan la hetan salva.
“Akontesimentu ne’e hosi sira deskonfia sirkuitu eletresidade ruma ou te’in hela buat ruma mak la hamate ahi matan ruma, maibé seidauk hatene kle’an tanba ahi boot han motuk ona,” informa Xefe Suku Abo ba Neon Metin via telefone Kinta-feira (17/11).
Autoridade lokál ne’e hatutan, hafoin akontese nia parte kontaktu kedas pontu fokál Autoridade Protesaun Sivil Postu Administrativu Quelicai ho evidénsia atu apoiu emerjénsia ba vítima sira, hodi hein prosesu rekoperasaun obra.
Entretantu vítima Tereza moris nu’udar faluk ho oan na’in neen da-dauk ne’e hela provizóriu ho família sira.
